Macahu tellemcahu ad tt-yeḍbeε Ṛebbi d asaru. Zik-nni, yella yiwen useggaḍ d igellil, yesεa ala taflukt d tamectuḥ ixeddem yis-s, mačči am wiyaḍ i ikesben iɣerruba meqqren, sekcamen-d lerbaḥ d imxulaf. Yiwet n tsebḥit, yekker-d, iruḥ am tannumi, yeqsed lebḥeṛ, iḍeggeṛ acebbak γer waman, yettṛaǧu s ṭṭmaε d layas, armi a-t-an iḥus d ucebbak ẓẓay, yefreḥ, la d-ijebbed s tγawla. Acu kan, iwala kra deg ucebbak mačči d lḥut! Iεawed nezzeh tamuγli, iwala tameṭṭut; azgen si tfekas-s d islem.
Yefqeε, yewhem, yenna-as: « Suhdeγkem s Ṛebbi ma ur id-tenniḍ d acu kem? ». Tenna-as: « Nekk d tislit n lebḥeṛ, ttxil-k ma ur i yi-tserrḥeḍ ». Aṣeggad: « Ur ttaggwad, ad am-serrḥeγ, mačči d kemm i d lmeqsud-iw ». Ihi, yeddem acebbak, yefsi-as i teslit n lebḥeṛ.
– Ay aseggaḍ, acimi tserḥeḍ-iyi bγir cceṛṭ, tbaneḍ d argaz ilhan?
– Acu tebγiḍ am tceṛḍeγ, Ṛebbi ixelqikem-id di tlelli ilaq ad d-tiliḍ deg-s.
Din i tefṛeḥ teslit n lebḥeṛ, tenna-as: « Ay argaz, ayen tettmenniḍ ad ak-id-yelḥeq tura, menni ayen-nniḍen d ccγel-iw ». Aseggaḍ: « Acu ara m-iniγ? Nekk d igellil, ttnadiγ ttawil i wakken ad refdeγ imaniw, ad xedmeγ am wiyaḍ ». Tenna-as: » Qqen allen-ik ».
Iqqen allen-is. Syin kan tenna-as: « Ldi-tent ». Yufa sdat-s yiwen n lbabuṛ n ssyada akken i t-yettargu. Yuγal urgaz yewhem, yufeg si lfeṛḥ, yeqqaṛ-as: « Inu wagi s tidet inu? ». Tennaas: « Ayen tebγiḍ siwel-iyi-d ad ak-t-idfkeγ ». Yuγal urgaz ixeddem s lbabuṛ ajdid, tbeddel fell-as tegnit, yettsewwir adrim mliḥ, maca mazal yettmenni akteṛ. Iṣubb tameddit γer lebḥeṛ yessawal s lǧehd ugerjum-is: « Ah tislit n lebḥeṛ, ah tislit n lebḥeṛ ». Teffeγ-d seg waman tenna-as: « Acu tebγiḍ ay aseggaḍ, yak tura ad ak-ttwaliγ labas fell-ak trebḥed ».
– Lḥemdu li Allah, maca ixuṣs-iyi uxxam yelhan, aεecciw-ina i kesbeγ, ur yerni ara fell-i.
– Giγ-ak ttawil limmeṛ d lebγi ad tebnuḍ axxam i yiman-ik, maca akka, qqen allen-ik… Tettkemmil
Yahia Yanes