Tura d ayen, teddez, tebrez, teɛqel Faḍma argaz-is. Tifranin ɛeddant, aberreḥ yekfa, d lawan ad nnejmaɛen yimdanen s ixxamen-nsen. Ara d-yeqqimen deg unnar d ikabaren d uselway i d-yufraren.
Agdud azzayri yeḥḍer i yiwet n tmeɣra, anda yal yiwen acu n taɣect i d-yewwi. Bouteflika, yettgalla yeqqar, xedmeɣ,; bniɣ,; yerna ma teddem yid-i ad rreɣ tamurt tettfeǧǧiǧ. Louiza Hannoune, tumen ad d-terr asirem i yimdanen, tessawal i usefsex n tejmaɛt taɣelnawt anda akken i d-teqqar awal-is. Ahat, tebɣa anda ara tessusem ! Lḥasun, yal wa acu yeqqar, wissen kan ma yella s tidet umnen belli imdanen slan-asen, yerna ad ten-fernen ?
Ass n lexmis yezrin, kra n wayen yellan di taccuyt, yessali-t-id uɣenǧa. Akken bɣun ilin lehḍur, aselway yuli, imdanen llan wid iruḥen s yisendyaq n lbuṭ. Ihi, tekfa tmeɣra. Acu ara yerǧu uzzayri tura ? Aɣilif amezwaru atan yezdeɣ imawlan yettwalin tarwa-nsen ttruḥun di lebḥer ɣer tmura n lberrani, d Les clandestins ! D tiɣri tamezwarut i uselway ad yeg leqrar i yilmeẓyen-agi i itett lḥut, mi akken amdan ur yezmir ara ad d-yaɣ kilu n lḥut. Tanezduɣt, d anezgum ameqqran, imi ddiq yezdeɣ ula d ulawen. Lehna, imi neqqar nettat teɣleb leɣna, wissen amek ara d-ters ? Ssmaḥ,; yugi-t uselway Bouteflika, skud imesḥaf yebɣan ad snegren tamurt ur d-uɣalen ara. Lxuf yezdeɣ ulawen, ur yeffiɣ imnaṛen. Lakul iger-d tiɣri ad d-yettwasellek si “le bricolage”. Lḥasun, timsal aṭas, ttawilat ur xussen ara di tmurt. D acu kan, wissen kan anida i icudd yixef-is ? Wissen tikelt-a, segmi ncerreq, nɣerreb ahat ad d-naf anda texreb ?
M. Smail