Am yal aseggas, yettɛeyyin-d i yimesdurar lawan n tleqqaḍt n uzemmur, s tisin n tegrest tasemmaḍt. I lmend n uqabel-is deg tegnatin igerrzen, bdan si tura yimezdaɣ n Ayt Smaɛel aḥebber n ttawil ara yeffɣen fell-asen teɣzi n wannect ara tdum ccetwa mm yigeffuren. Ulamma llan wid i tt-yefran aṭas-aya, imi kkren i uzdam neɣ i tiɣin n yisɣaren d yiqejmuren deg unebdu yezrin, mazal wid iwumi ur d-iban ubrid ɛad. Meḥsub, gar useḥmu s umseḥmu n lgaz d win umaẓuṭ, ur tt-gzimen di rray acu ara fernen. «Yezmer lḥal ad d-naɣ aseggas-a azal n 300 neɣ ugar n litrat n lmaẓuṭ s wayes ara nesseḥmu di ccetwa-a.
Aseḥmu s lgaz ur aɣ-yettqi ara di twacult, rnu ur d-yettak lḥuman i nebɣa», i d-yenna yiwen n umezdaɣ n Ayt Smaɛel. Di tmetti, llant daɣen twaculin tilemmasin i yeddmen rray n useḥmu n tqerɛatin n wurrig (lgaz) imi ur ten-yeǧǧi wayen i d-ssekcamen d tadrimt ad gen akken-nniḍen. « Akken ad seḥmuɣ s lmaẓuṭ, ilaq-iyi yal ass lqidar n 5 n litrat d idrimen. Annect-a d ayen iwumi ur yezmir lǧib-iw », d awalen n yiwen n ubabat. Si tama-nniḍen, aṭas i terra tmara, seg twaculin tiẓawaliyin abeɛḍa, ad fernent aseḥmu rrif ukanun neɣ s umseḥmu n yisɣaren, ɣas ma yella azdam n wass-a mačči am win n zik. Ahat imerkantiyen, ttaɣen-d isɣaren s yikamyan ma bɣan, wanag wid ur nesɛi tadrimt, ɣas heggan kra n taffa deg wayen iɛeddan, yettḥettim-iten lḥal ad d-zeddmen ula ussan-a n usemmiḍ. Ɣas uqant ayendin tzedmin di lexlawi, yal mi ara temhawen, neɣ ad d-yeḍs cwiṭ yigenni, ad farsen tagnit, ad rzun ɣer teẓgi ad d-glun s kra n yikeccuḍen.
M. K.