Thegga-d tenmehla n tɣellist taɣelnawt azal n 62 714 n yipulisen akken ad sseḥbibren u ad ɛassen ɣef yikayaden n taggara n useggas n kraḍ n yiswiren (aɣerbaz amenzu, alemmas d tesnawit) i yetturaǧun ad d-ilin deg wussan-a. Imsulta-a, ad ttwasuzren ɣef 11 937 n wammasen n usɛeddi deg yakk akal n tmurt. Yusa-d lamer-agi akken ipulisen-a, ad sǧehden laman deg unnar, ladɣa deg yidgan i d-yezzin i wammasen n usɛeddi n yikayaden.
Akken diɣen ara rafqen aqeddic yerzan tiwwin d usuzer n yisental n yikayaden akked uqeddic n wawway n tfertin n tririt ɣer wanda ilaq deg tenmehliwin n usedwel. Yerna-d wulɣu n tenmehla n tɣellist taɣelnawt d akken ad ilin yiɣallen n laman deg berra n wammasen ɣer tamiwin iqerben ladɣa deg sswayeɛ n tṣebḥit, ma neẓra belli tuget n tikli ama n yimrecḥen ara yesɛeddin, neɣ d tiwaculin-nsen i ten-id-yettsaɛafen. Ad ilin diɣen i lmendad n tkeryas i iḥebbsen ɣer tama n yiɣerbazen.
Annect-a yakk, akken ur d-ttuɣalen ara yineḍruyen yellan deg yiseggasen-a yezrin, d wayen yeɛnan asuffeɣ n yisental n BAC uqbel lawan. I usemekti, yetturaǧu ukayad n taggara n uɣerbaz amenzu seldazekka n larebɛa, 29 maggu 2019. Ma d win n uɣerbaz alemmas, ad d-yili send lɛid tamecṭuḥt, seg 9 ar 11 yunyu. Ma d akayad n BAC seg wass n 16 ɣer 20 yunyu 2019.
K. A.