Beggsen yimezdaɣ n taddart-agi akken ma llan: Yal wa s wayen yezmer; ama s tedrimt, ama s iɣallen , neɣ s yisufar yemgaraden d ttawilat n uxeddim deg wahil n usizdeg n taddart-nsen.
Sdat n ugdal n tsertit iwatan n unegmu d ugarrez n ukatar n tudert n yimdanen, seg yemḍebbren teεna tamsalt, kkrent-d i yiman-nsen temdinin d tudrin n tmurt n Leqbayel i tsertit n ugerrez d tezdeg n tudrin. Yella-d waya s lmendad n tcetlin n Useqqamu Aɣerfan n lwilaya n Tizi-Uzzu i d-yessudusen, yal aseggas, timsizzelt Rabah Aissat n taddart zeddigen. Tukci n tedrimt swayes i d-tgellu temsizzelt-a, tettak afud muqqren i teseqquma n tudrin, akken ad sεunt tissas ɣef tezdeg n tudrin-nsent d umḥizwar ɣef yimeḍqan imenza n temsizzelt. Yiwet gar tudrin i d-yefraren s leqdicat-is yeddan deg tsertit n usizdeg d ugerrez n tudert, d taddart n Icerqiyen yettabaɛen tɣiwant n Mεatqa.
Beggsen yimezdaɣ n taddart- agi akken ma llan: Yal wa s wayen yezmer; ama s tedrimt, ama s iɣallen , neɣ s yisufar yemgaraden d ttawilat n uxeddim deg wahil n usizdeg n taddart-nsen. Aṭas n tigawin d leqdicat i d-yellan s lmendad n teseqqamut n taddart n Icerqiyen, d tddukkla n useḥbiber ɣef twenaṭ, i d-yessuddsen ticemliyin d twiziwin n usizdeg, d ugerrez n tewwurt n unekcum ɣer taddart, asenqes deg usemres n wayen akk yettḍurun agama d twenaṭ. Am waken i d-tella tuẓut n yijeǧǧigen ɣef leryuf n yiberdan imeqqranen n taddart akked uqεad n yizenqan n taddart. Iban-d umgarad d ameqqran gar wakken tella taddart-agi deg yiseggasen iεeddan d tura.
Ula d imezdaɣ, beggnen-d lfarḥ-nsen s leqdicat-agi igerrzen, i d-yefkan tugna yelḥan i taddart. Dɣa ssaramen ad ilin seg yimezwura deg temsizzelt i d-iteddun.
Ali Zalouk