Am wakken i t-id-ṛeggmen yiɛeggalen n umazday n tedmi d tesleḍt tasertant d tdamsant akked tmettit (CRAPES) n tɣiwant n Ait Aissa Mimoun, i d-ilulen ussan-agi kan ineggura, ad yili leqdic-nsen deg unnar. Dɣa ass-nni n lexmis, 23 maggu 2019, i d-tella tigawt-nsen tamezwarut deg unnar, d asarag ɣef unegmu idumen s umata d win n tɣiwant n Ait Aissa Mimoun s wuzzig. Am wakken daɣen i d-yella deg-s umeslay ɣef tdamsa akked twennaḍt duseḥbiber-ines. Di tazwara, yella-d umeslay sɣur yimsuddsen n leqdic-a.
D Mass Amar Bedrani, aselway n tddukkla Itri n Uzekka, i d-yefkan awal n tazwara n usarag-agi. Syin akkin, d duktur Aezki Chenane, i d-yebdan awal , s usenmmer n yimsuddsen n leqdic-agi. Dɣa deg wawal-is, yenna-d : «Ass-a, yettezzi ittenneḍ wawal-agi n unegmu idumen, maca ar melmi ara d-yili di tidet. Win tufiḍ ad d-yemmeslay fell-as, meɛna ilaq ad yili akken ilaq anda akken ilaq». Yuɣal yemmeslay-d ɣef yibaɣuren n unegmu idumen, dɣa yenna-d : «Di tidet, ulac anegmu ur nettdumu ara, ilaq ad d-yerr i lḥewj n tsuta n wass-a, mebla ma iḍur tid i d-iteddun. Anegmu idumen, d abeddel adamsan, imetti, i ilaqen ad d-yerr i lḥuǧ n yimdanen d win ara d-ixelqen lɣella…».
Ikemmel awal-is, dɣa iberreḥ-d s waya : «Anegmu idumen, iressa ɣef 4 n terkizin-agi ; tadamsa, timetti, tawennaḍt rnu ɣer wid teɛna temsalt (les auorités). Yefka-d diɣ amezruy n tmiḍrant-agi n unegmu idumen, i d-yennulfan deg useggas n 1972, yennerna s lweqt i wakken ad yaweḍ tineggura-agi ɣur-nneɣ. Yesḥassef ɣef tudrin yettawin arrazen n tuddar zeddigen, maca tezdeg-nsent ur tettdumu ara. Ɣer taggara n wawal-is, iger-d tiɣri, i uxlaq usenfar n unegmu idumen deg tɣiwant n Ait Aissa Mimoun deg wussan i d-iteddun.
Tin ɣur-s, d duktur Ali Touat iwumi yettunefk wawal, anda i d-yemmeslay ɣef wamek yezmer ugama ad iḍur tadawsa (sseḥḥa) n umdan, syin yemmeslay-d ɣef ssebbat iṭṭurun tazmert n umdan, gar-asent: leɛmer, tawennaḍt, tezdeg, aswir n leqraya… Yenna-d : «S waman , azwu, lḥess i yezmer ugama ad iḍur amdan. S waman d uzwu akked wakal i nessemsax tawennaḍt-nneɣ. Ulamma ilaq ad neddu ɣer sdat, maca ur ilaq ara ad nessimes i ugama-nneɣ». Ikemmel yenna-d : «Aṭṭanen-agi i nhellek yal ass, d nekkni i ten-id-ixelqen s yiman-nneɣ, neṭṭeggir-iten ɣer berra ttuɣalen-d s axxam». Yuɣal-d daɣen ɣer wassaɣ yellan gar umdan akked ugama, anda i d-yenna: «Ma bɣiɣ ad rebḥeɣ idrimen, ur ilaq ara s lemḍra n ugama».
Syin akkin, d Mass Salah Rachid s yisem-is, d imseddu n tkebbanit «Aluverplast» ixeddemen deg usefrek n yiḍuman, i d-yewwin awal ɣef tkebbanit-agi-ines i d-yettarran iḍuman d isufar ara yessemres umdan : uzzal, nnḥas, aplastik, akerṭun, zzit…atg. Yuɣal-d diɣ ɣer yiswi n tkebbanit-agi, yenna-d : «Gar yiswan-nneɣ igejdanen d axlaq n yimukan n uxeddim, asezdeg n twennaḍt-nneɣ, axlaq n lɣella… Seg 2011 ar tura, nxeddem akked 126 n yixeddamen i d aɣ-d-yettawin iḍuman ɣer tkebbanit-agi, gar-asen ilmeẓyen, wid ur nxeddem ara, imɣaren…». Yesḥassef ula d netta si tama-s, ɣef wayen tesruḥuy ddula n yidrimen deg ujmeɛ n yiḍuman s yikamyunen, imi tezmer ad tawi ugar n wayen tettsarrif deg wass. Ɣer taggara n wawal-is, yemmeslay-d ɣef wuguren i d-yettmagar netta d tkebbanit-is yal ass, acu kan s lebɣi n usefti deg uḥric-agi, mazal-it ixeddem.
Adaoun Abdelghani