D amezruy aqbur i yettkemmilen ɣef Umaziɣ, d acu, s wudem-nniḍen kan. Wamma ur mgaradent ara aṭas tegnatin d tmentilin ideg yesselqef Yugurten di leḥbus n Ruma akked tid ideg yemmut umeɣnas Amzab Kamal Ddin Fexxar deg tkurmut n tmurt-is. Ɣef tektiwin-nsen d tlelli-nsen, ɣef wayen gan deg unnar i ubeddel n waddad n Umaziɣ deg wakal-is, i d-sseɣlin yiberraniyen lbaṭel fell-asen.
Ar melmi ara ttmettaten deg yir liḥala yirgazen, wid yettxemmimen ɣef ugdud-nsen, wid yesɛan tiktiwin n tlelli d lɛali, ad ttidiren deg yifutayen wat yiqerra ilmawen? Nwala mi akken yella yettnaɣ d iseggasen akked udabu, drus i d-yesbeggnen ibeddi-nsen ɣer tama-s d tin n uɣref Amẓab, asmi yemmut, yal wa yekker ad yerfed imru, ad d-iceyyeɛ aḍris-is ɣer Facebook. Ulaɣer akk iɛfifen, iḍrisen-nwen ɛeddan war azal acku Kamal Ddin Fexxar yeɛqel si zik aytma-s Imaziɣen, yeẓra anwi i yettnaɣen ɣef tlelli s wayen sɛan d tizemmar, d wanwi i d ixsimen, neɣ i yeddurin ajeɣlal n rrxa d tedrimt. Kamal Ddin Fexxar, i yellan d aduktur di tesnujjya, seg 2004 i as-yerra udabu tudert teḥres deg wakal-is.
Armi ula d tawuri-is n umsujji, yessegra-tt deffir umennuɣ-is. Ur yelli kra n wanɣa i iga, ḥala lebɣi n teɣdemt, n tlelli d uḥraz n tmagit n ugdud-is, i yettengugan seg useggas ɣer wayeḍ. Ass n 17 meɣres iɛeddan, kra n wussan send ad yettwaṭṭef tikkelt-nniḍen, yura aya di teɣrabt-is n Facebook, s tefransist: « Mi ara tiliḍ tettwaɛuffeḍ, tettwaḥeqqreḍ, tettwaḥebseḍ di tmurt-ik ɣef tmagit-ik, d ta i d tamhersa ». Seg tedyant-a i iḥuzan s waṭas tawacult-is d warraw-is imecṭaḥ, txemmem tddukkla tazwawt n Toulouse ad d-teg tabezzart i ujmaɛ n tedrimt i twacult n umerḥum. Akka tura aṭas i yekkin di twizi-a i wawwaḍ ɣer 20.000 n yiyuruten. Sgunfu di talwit ay Amaziɣ!
M. K.