Nella nemmeslay-d ussan yezrin ɣef leḥṛis i ttidiren yiṛemmaṣen i d-yesnulfan tikebbaniyin-nsen s ttawil n usmad i d-wwin seg Ansej, neɣ Cnac. Imi ineggura-a, amur ameqqṛan deg-sen ur smurrsen ara deg yisenfaṛ-nsen, dɣa ufan-d iman-nsen sdat uɣbel d ameqqṛan. Ayagi acku, rnu ɣer lexṣaṣ n ttawilat n uxeddim, d yisenfaren-is i yettruḥun s tmussni d ddaw ufus , ttidiren yiṛemmasen-a leḥṛis d ageεmir sɣuṛ yimḍebbṛen n tmurt-a. Di tecwawt-nsen aneɣlaf n uxeddim d ṭṭmana tinmettit aqbuṛ Muṛad Zemmali, akked yinemhalen n lbankat, i yezgan deffir-nsen, skerhen-asen ula tudert-nsen.
D ayen i yeǧǧan ilemẓiyen-a, snulfan-d tiddukkliwin tuzzigin ara asen-d-yawin izerfan-nsen, am tddukkla Came n Tizi Uzzu, i yellan d tamezwarut i yesḥebsen asekcem n yiṛemmasen deg ccreε deg twilayt-nsen. Seld leqdic-nsen igerrzen, kkrent twilayin-nniḍen i uεaned, daymi i d-snulfant ula d nutenti tiddukkla Came deg yal tawilayt n tmurt. Tineggura-a, dduklent lwaḥi, rzant ɣur uneɣlaf n uxeddim amaynut Ḥasan Tijani, ḥkan-as iɣeblan i ttidiren yilemziyen. Daymi i asen-d-yefka awal belli ad iceggaε i lbankat i wakken ad ḥebsent adeggeṛ n yilemẓiyen i ccṛeε. Lameεna ayagi yeεna kan wid ur yezzinz sselεa-nsen, ma yella d wiyeḍ ad ttwaḥasben. Tamsalt-a, tessemɣi-d cwiṭ n usirem deg wulawen n wid yenḍeṛṛen, Dɣa yenna-aɣ-d yiwen : «skud ur twaḥassben wid yukren, ur nettili ara d iseflan, ihi afus deg ufus taεkemt ẓẓayen ad tifsus».
K. K.