Aɣmis n Yimaziɣen: deg tazwara, efk-aɣ-d agzul n umecwar-ik deg ccna…
Farid Ferragui : Azal n 36 n yiseggasen-a segmi bdiɣ cennuɣ, imi tuɣac-iw akk timezwura cniɣ-tent deg useggas n 1981. Acu kan, nekk segmi bdiɣ cennuɣ ala tamedyazt i xeddmeɣ nekk s timmad-iw i xeddmeɣ deg tezlatin-iw. Aḍebsi-iw amezwaru, iffeɣ-d deg useggas 1981s uzwel «Ay ul yebɣan tullas». Seg useggas n 1981 almi d aseggas n 1994, yal aseggas suffuɣeɣ-d album, llan-d akka (1981 «Ay ul yebɣan tullas», 1982 «A yemma», 1983 «Taxatemt», 1984 «Lḥara», 1985 «Tagmat», 1986 «Tidet», 1987 «Mačči d leqraya», 1988 «Ay imḍebbren», 1989 «Akal d yiẓuran», 1990 «Udem n tlelli», 1991 «Mi ara d-tezi tefsut», 1992 «Akessar d akessar», 1993 «Ad necnu tayri», 1994 «Tamurt-iw»). Syin deg 1996 d «D kemmini i d-iyi-yuran», deg 1998 snat n tesfifin i d-suffɣeɣ d «Targit» akked «Iceqqaq udrar». Ruḥ akkenni alama d 2001 i d-rniɣ album wis 18 s uzwel «Terram-iyi ɣer tayri» Deg useggas n 2003, sazergeɣ aḍebsi-iw wis 19 s yisem «Lebḥer». Di 2004 ur xedimeɣ ara armi d 2007 i xedmeɣ CD wis 20 s uzwel «Asif n tudert». Syin daɣen qqimeɣ armi d 2012, rniɣ-d album-iw wis 21, s yisem «Nekk d yiman-iw». Qqimeɣ alarmi d 2016 i wakken i d-rniɣ CD aneggaru wis 22 s uzwel «Itri areggal».
Anida yewweḍ uswir n tezlit taqbaylit tatrart?
Aswir n tezlit taqbaylit, kra qqaren-ak yuli, kra-nniḍen qqaren-ak iṣub. Ma d nekk ttwaliɣ belli ur iṣub ara, ur yuli ara, d alemmas kan. Yal ccna deg umaḍal tḥuza-t twaɣit-agi n wallalen itiknulujyen. Nekk s timad-iw ur ḥulfaɣ ara i lexsas-agi, imi mazal sɛiɣ imferǧen i yi-ḥemmlen aṭas aṭas. Ar tura, mazal ifennanen i ixeddmen timeɣriwin deg tzeɣwa yeččuren armi d ulamek. Ttwaliɣ si tama-nniḍen, yuli-d cwiṭ uswir-is, imi llan wid mazal ṭṭfen deg uqdim, llan daɣen wid i d-yeglan s umaynut. Ilaq diɣen ad ilin imeslayen ẓiden, zeddigen, icebḥen, iweznen, axaṭar tura, imdanen d ayagi i bɣan ad slen. Llan ar tura wid ixeddmen tizlit n umeslay, tizlit taqbaylit, ḥemmlen-tt yimawlan-is ma yella izeddig umeslay-is. Si zman aqdim, ɣur-nneɣ nekkni d imeslayen i yufraren ɣef uẓawan.
Amek-it usizreg n tesfifin deg tmurt-nneɣ?
Asizreg n tesfifin deg tmurt-nneɣ, zik i yewɛer ɣef tura. Deg yimir-a, llan yicennayen i yesɛan ttawil, xeddmen asekles deg uxxam. Acu kan daɣen mačči awi-d kan ad d-tessufɣeḍ tasfift, imi tura yeshel maḍi, maca awi-d ad telḥu, ad tenz…atg, tura yerna d tamsalt n yidrimen kan, mačči am zik.
D acu-ten wuguren i d-ttmagaren yinaẓuren s umata?
Imi nekk d acennay, zemreɣ ad d-meslayeɣ kan ɣef yicennayen i yi-icuban. I d-ttqabalen waṭas n wuguren d yiɛewiqen. Deg tazwara ur ten-fehmen ara medden, aɣbel n yidrimen d ttawilat iwulmen, lexsas n tmeɣriwin n ccna, ugur n usenzi n tesfifin-nsen.
Acu i d-wwint tmeɣriwin n ccna i tezlit taqbaylit?
D timeɣriwin n ccna i d-isebganen ma yella acennay ḥemmlen-t medden s waṭas, neɣ cwiṭ kan . D imferǧen-nni i d inigan ɣef wanect-a. Ma llan s xilla, lemaɛna-s afennan-agi yeɛziz ɣur-sen. Timeɣriwin-agi, zemrent ad ad as-xedment tadlelt neɣ abaɣur i ufennan. Ulac acennay ara k-yinin belli nekk sɛiɣ imferǧen, ma yella ur ixeddem ara timeɣriwin n ccna. Ala afennan-nneɣ ameqqran Chikh El Hesnaoui, ur nxeddem ara timeɣriwin ɣef usayes, yerna ḥemmlen-t akk medden.
Acimi d isefra-k kan i tettɣeniḍ?
Segmi bdiɣ asizreg deg useggas n 1981 ar ass-agi, leεmer ɣennaɣ asefru n yiwen deg tezlatin-iw, ula d lmusiqa diɣen, ala ayen kan i d-iteẓẓem wallaɣ-iw i cennuɣ. Acu kan mačči i wakken ad d-sbegneɣ iman-iw belli sneɣ neɣ zemreɣ. Aṭas n tikkal i d-ufiɣ isefra n waṭas n yimedyazen i yi-iɛejben aṭas, maca ur zmireɣ ara ad cnuɣ asefru n yiwen, akken ad d-iniɣ belli inu. Imi daɣen isefra d tazlagt n tikta, yal asefru d asemmad n tikti n gma-s. Isefra-w diɣen, mseḍfaren wa deffir wa, akken iten-ttidireɣ i ten-ttaruɣ i ten-cennuɣ. Γef wannect-agi, ur cennuɣ ara isefra n wiyaḍ deg tezlatin-iw.
D acu i d iswi-inek deg yisaragen txeddmeḍ?
Ḥemmleɣ isaragen, imi ttakken-iyi-d tagnit i wakken ad meslayeɣ d yineɣmasen, d wid akk i yi-ḥemmlen nekk s timad-iw, d wid iḥemmlen tizlatin-iw. Ttfraseɣ diɣ deg-sen tagnit i wakken ad d-rreɣ ɣef yisteqsiyen iceɣben allaɣ n tɣamsa neɣ n yimferǧen-iw. Yal tikkelt ideg ara xedmeɣ tameɣra deg uxxam n yidles, xeddmeɣ asarag uqbel-is. Taggara n ddurt-agi, ass-nni n sem 10 akked sed 11 deg waggur-agi n meɣres, xedmeɣ snat n tmeɣriwin deg uxxam n yidles Mulud Mɛemmri n Tizi Uzzu. Maca uqbel-is, giɣ-d asarag ass-nni n lḥed 05 deg waggur-agi ideg nella, deg tzeqqa tameẓyant n uxxam n yidles.
D acu ara d-tiniḍ ɣef snat-nni tmeɣriwin i t-xedmeḍ deg taggara n ddurt-agi?
Ad asen-iniɣ i yimsuddsen n leqdic-agi tanemmirt-nsen tameqqrant, am wakken daɣen ara awen-iniɣ tanemmirt-nwen tameqqarnt i kunwi s yixeddamen n Uɣmis n La Dépêche de Kabylie, i d-yusan ɣer tmeɣra-agi tameqqrant. Ad asen-iniɣ diɣ tanemmirt i kra n win i d-iruḥen i wakken ad i yi-nezzah.
D acu i d ahil-ik i useggas-agi n 2017?
Ma d ayen yerzan ahil-iw i useggas-agi amaynut n 2017, yebda s snat n tmeɣriwin-nni iɣef i d-nmeslay yakan tidak n 10 akked 11 seg meɣres deg Tizi Uzzu. Akka tura banent-iyi-d snat n tmeɣriwin-nniḍen, yiwet ass n sed 01 deg waggur yebrir 2017 deg Le Théâtre des Sablâtes deg Lezzayer Tamaneɣt. Tis snat ass n 15 deg waggur n yebrir i d-iteddun deg temdint n Montréal di tmurt n Canada.
Ma yettili-d umεiwen gar yicennayen n tmurt-nneɣ neɣ ala?
Ulac amεiwen gar-nneɣ s yinaẓuren, ladɣa icennayen. Imi ur sɛan ara s wacu ara mɛawanen gar-asen, imi daɣen ur ttemyagaren ara s waṭas. Ma d nekk ayen iwumi zemreɣ ttɛawaneɣ yis-s icennayen-nniḍen, yerna nekk ulac win i yi-ɛawnen. Nxuṣ cwiṭ deg ccɣel-agi. Acu kan mačči d tuccḍa-nneɣ, imi si zzman aqdim, nufa-d belli icennayen-nneɣ imezwura ur ttemεawanen ara gar-asen, ama dagi deg tmurt ama deg tmura tibaraniyin.
Ma tumneḍ belli yezmer ucennay aqbayli, ad yuɣal d acennay n umaḍal?
D tamsalt n ttawil, imi ulac idles neɣ taɣerma yufraren ɣef tayeḍ. Ma nwala belli ass-agi idles s umata d tezlit s wuzig n tmura n lɣerb n umaḍal, tennerna s waṭas, imi i asen-xedmen ttawilat imeqqranen i yinaẓuren-nsen. Zgan d radyuwat d tilibizyuwa-nsen, deg youtube…atg. Deg tmurt-nneɣ diɣen yeǧhed aṭas yidles aɛrab, iɣleb win n tmazɣa, imi d ddula i yebɣan annect-agi. Fkan aṭas n ttawilat ilaqen i yidles aɛrab, ǧǧan win n yimaziɣen ɣer ṭṭerf. Lukan ad as-tefkeḍ ttawilat i d-as-iwulmen i yidles d yicennayen imaziɣen, zemren ad xedmen leɛǧeb.
Ma yella win ukkud tesqerdiceḍ isefra-k?
Yal tikkelt mi ara xedmeɣ asefru, ad t-seɣtiɣ weḥd-i ad as-alseɣ taɣuri aṭas n tikkal, maca ur d tettakkeɣ ara i wiyaḍ i wakken ad iyi-d-fken tamuɣli-nsen, ama d imedyazen neɣ d imdanen-nniḍen. Tikwal mi ur tḥeqqeɣ ara deg takti, seqsayeɣ win ufiɣ sdat-iw, akken ibɣu iga neɣ yella.
Ma yella wayen tessewjadeḍ?
D tidet, sewjadeɣ yiwen n album amaynut, maca wellah ma ẓriɣ i melmi ara yewjed i wakken ad d-yeffeɣ.
Awal-ik n taggara?
Tanemmirt-ik ɣef tdiwennit-agi i yi-texdmeḍ i nekk d leqdicat-iw idelsanen. Tanemmirt tameqqrant i Uɣmis n Yimaziɣen imi i yi-iga azal, ad awen-iniɣ afud igerrzen i kunwi d uɣmis-nwen. Ad iniɣ tanemmirt s tussda i wid akk i yi-ḥemmlen, d widak yesmeḥsisen i tuɣac-iw.
Yesteqsa-t Adaoun Abdelghani