Ass n 15 meɣres yezrin i d ass agraɣlan n yizerfan n umsider. Ilaq ad d-nini ulamma taluft-a terza tazwara aɣerman, maca d awanek i yettmeslayen ugar fell-as s ubrid n umaṭṭaf d tiliẓri abeɛda. Ula d tiddukkliwin n tamiwin, drus maḍi i d-ibeddren taluft-a, neɣ i d-yettheyyin armuden beddemma, am wid n uselɣu d usḥulfu. Ɣef uḥesses dɣa, aṭas i yettwalin d akken din i tuḍen icc-is armi mačči kan ur fkin ara medden azal i wass-a agraɣlan, maca daɣen ur ẓrin ara yakk d acu-ten yizerfan-nsen s yisem-nsen d imsidren, d imsaɣen i d-yettaɣen s yidrimen ayen tetten d wayen sseqdacen. Ula deg umaḍal n ttjara d leswaq, yuzzel wawal i d-yeqqaren « amsaɣ d agellid ».
« Ixus s tidet uḥesses n yimdanen ɣef yizerfan i sɛan send ad d-aɣen kra, d ɣef umihi i izemren ad asen-d-yas seg wayen i d-ttaɣen. Amedya, ma llan yimsenza zemren ad senzen kra yexser, ur ilaq ɣef ukelyan ad yestehzi ɣef umuqel n tensagt n tudert n wayen akken i d-yuɣ. Ilaq ɣef tddukkliwin ad d-xeddment armuden i lmend n uḥesses n umsider », i aɣ-d-yenna yiwen n umeɣnas asddukklan. Si tama-nniḍen, ula d imaṭṭafen, meslayen-d ussan-a ɣef kraḍ n yisuḍaf igejdanen iɣef ttɛeddayen yimsenza; aɣbal n ufaris, tezdeg n tḥanut d ufsar n sswami i uzayez.
Seg tewtilin-a, tuget n yimsenza, ttqadaren kan tamezwarut i d-nebder, ɣef wakken i d-tenna teɣbalut-nneɣ. Wamma tid-nniḍen, yal wa amek i tent-yettruẓu meskud ula d taɛessast n ssrabes n Tenmehla n ttjara ur tɛumm aṭas. «Aṭas n tikkal i ufiɣ tiḥuna ur zeddigent ara, maca ur ẓriɣ ɣur wanwa ara cektiɣ. Ma yella d sswami, mazal caḍen wid ur tent-id-nfesser akken ad kellxen akken bɣan ikelyanen, ad d-rnun ad d-rebḥen kra n yidinaren », i aɣ-d-yenna yiwen umezdaɣ n Ayt Smaɛel.
M. K.