Seld taluft n yimcac imsaḍ, i d-igan ma drus 6 n yimejraḥ, ddren ussan-a kan yimezdaɣ n temnaḍt n Tigratin, taddart n Ayt Tɛisiwt, rrehba-nniḍen i icudden ɣer yiwen n wuccen i d-iẓedmen ɣef umḍiq n uzedduɣ. D ayen ur d-neḍri seg waṭas n yiseggasen tura, imi uccen d win yettaggaden amdan, ur d-yettqerrib ɣer wanida caḍent tnezduɣin. Maca tikkelt-a, ɣef rray amatu n medden, d laẓ i yeǧǧan uccen ad yettcali ɣer unadi n tgella armi d tasebḥit, war ma iga i yiman-is tilas. Dɣa, mi d-iɛedda yiwen n yilemẓi si tama n tebḥirt, yesla i usuɣu i yeffɣen i leɛwayed. Armi iwala d uccen, yessawel i temɛiwna n lɣaci akken ad t-id-ṭṭfen.
Ayen yesḥissifen, d taɣara amek i as-lḥan yimezdaɣ i taluft d wamek nɣan uccen-a amraɛ. Acku, seld mi as-reglen kra n yimdanen akk tizerbatin n trewla, kkaten-t s yiblaḍen armi yefcel, syinna kemmlen-as s yiɛekkazen armi yemmut. «Uccen-nni yella yettgabar kra meskud ur yeqqim deg umkan-is n tudert, di lexla, ulamma yuli wass. Cwi kan nessaweḍ neddukkel, nenɣa-t war iɣilifen, acku yella d amihi ama i warrac, i yimeqqranen neɣ i yiɣersiwen-nneɣ», i d-yenna yiwen n umezdaɣ n Ayt Tɛisiwt. Ad d-nesmekti d akken ssawlen yiɣermanen i yimḍebbren n tɣiwant n Ayt Smaɛel uɣur sutren awelleh mi nɣan dayen aɣersiw-nni. Dɣa, nnan-asen yimasayen ilaq kan ad meḍlen agectum n wuccen akken ur t-yettaweḍ uɣersiw nniḍen, ur d-yettili usedreɛ n kra n waṭṭanen ma yella yuḍen. Imir-nni i ddmen yilemẓiyen lǧifa n wuccen, wwin-tt ɣer wadeg yexlan, meḍlen-tt deg teɣder n wakal.
M. K.