“Ad yuɣal ad yegzu, zriɣ, belli imdanen ur llin ara akk d iḥeqqiyen, d ibuneyyiten. Maca, sefhem-as belli akken i yella yir lɛebd i yella wergaz i imeɛnen, akken yella usertay n yiman-is i yella usertay n wiyaḍ… Sefhem-as, daɣen, belli akken yella weɛdaw, i yella umeddakul.
Ddar-it seg tismin … Ma yella tzemreḍ, mmel-as lbaḍna n taḍsa yersen. Selmed-as seg tura belli i yimesbaṭeliyen i yeshel uceffu n uqendur…
Ma tezmreḍ daɣen, mmel-as igerrujen n yidlisen. D acu, anef i wallaɣ-is ad icali, ad yaɛreḍ ad yegzu lbaḍna n yifrax deg igenni, n tzizwa d yiṭij akked d yijeǧǧigen yemɣin di tiɣilt di tlemmast n tzegzewt.
Di lakul, selmed-as belli axir-as ad yexṣer wala ad yaweḍ s takkerḍa …
Selmed-as amek ara yamen s tektiwin-is, ɣas ma medden akka qqaren-as ur mniɛent ara. Mmel-as amek ara yili ḥnin d wid ḥninen, zur d wid zuren.
Muqel amek ara s-tefkeḍ lǧehd akken ur yettabaɛ ara lɣaci i iteddun d waḍu d-isuḍen. Mmel-as amek ara yefk tameẓuɣt i yimdanen, amek ara isif ayen i wumi isel, ad d-yefruri wayen yelhan.
Mmel-as, ma tzemreḍ, amek ara yeḍs, mara yili yenḥaf. Sefhem-as belli mačči d lɛib ma iru.
Selmed-as amek ara iḥder iman-is seg tẓidanin. Mmel-as amek ara yezenz iɣlen-is d wallaɣ-is s ssuma ɣlayen, maca werǧin ad yeǧ ad t-sawmen deg rruḥ-is d wul-is.
Mmel-as amek ara yeqqen imeẓẓuɣen-is, mara ttuɣun lɣaci, amek ara ibedd ad yanaɣ ma …
Lḥu-yas s leḥder maca ur tesiɛziz ara, acku d timest i isqadayen uzal.
Selmed-as amek ara yamen s yiman-is, acku imiren ara yamen s talsa.
Mačči dyen i isehlen, wali d acu i tzemreḍ ad txedmeḍ… mmi d aqcic lɛali !”
Yerra-t-id ar teqbaylit S.O.A