Akken ẓran wid akk yeṭṭafaren tilufa n udlis, tettwaldi di Lezzayer tamaneɣt, ass n 26 deg ṭuber iɛeddan, rreḥba tagraɣlant tis 22 n udlis, ara yekfun ass n 5 deg unbir-a. Am dima, ur iban ma tettmagga tedwilt akken ad ternu ccan i umeskar d udlis, neɣ akken kan ad teg kra n leswaq n tedrimt n wa d winna. Aya, acku tuget n yimeskaren, i d-yessufuɣen ladɣa ɣef ddemma-nsen, ur ufin tawwurt tettwaldin ma bɣan ad ssisnen ayla-nsen neɣ ad mlilen imeɣriyen, meskud ur sɛin tadrimt swayes ara xellsen timeḍqatin n uzzenz. Rnu, ula d wid i d-yessufuɣen ɣer teẓrigin, ur teɣzif nnuba-nsen din ugar n sin neɣ kraḍ n wussan. « Ttruḥuɣ tikwal d aḥewwas ɣer rreḥba-a n udlis deg tmaneɣt, maca werǧin ufiɣ tsaḥ-iyi-d tegnit iwulmen ad zzenzeɣ ayen uriɣ ». D awal n yiwen n umeskar amunen. Ahat mačči s waṭas n wawalen ara yegzu yiwen liḥala ma neẓra belli ula d imaẓragen, ččan tiyita seg tsertit n rreḥba-a n udlis, anef ɛad ihi amaru ayiwen. « Ula aseggas-a, iban-iyi-d ur ttiliɣ deg SILA. Ur sɛiɣ idrimen ad xellseɣ amḍiq n tnezzut i yeɣlayen mačči d kra ». Akka i aɣ-d-yenna yiwen n umaẓrag seg Bgayet. Di lawan ihi ideg adlis yettili yal aseggas d asentel n rreḥba n udlis, nezmer ad d-nini mazal ur yettunefk i umaru umkan-is, netta war-is ur ttnuḥent tira. Deg waya, ulamma kkin seg tɣemmar yemxalafen ddeqs n yixxamen n usiẓreg s wayen i d-ssaẓragen, ayendin n yimeskaren ara iɣiben i tikkelt-nniḍen ɣef tegnit-a i d-yessemlalayen imḥemmalen n udlis.
M. K.