Amezdi n At Mesbaḥ i d-yettaken tawacult “Ḥannaṭ” yellan di taddart n Tewrirt yettabaεen taɣiwant n Ukeffadu . Di tmida tis 20 uɣen akal deg uẓaɣar yellan di temnaḍt n Uzellagen aɣlad aɣelnaw uṭṭun 26 ,deg taddart “Bu Tagut “ɣef umhares Aṛumi “Tṭiṭaṛ”d win I yekksen amur-is i tmurt , yezzenz azaɣar i kraḍ n yirgazen deg udrum-nni , ṭṭfen agemmaḍ azal n 19 n igeṭṭaṛ , yesseɣ d aẓebbuj d tidekt , leqmen-t , yebra-d aṭas n yisufar “abu tteffeḥ , alemli, acemrar , abraraq&hellip,;bḍan angalus ɣef sin ,yiwen yewwi-t d yiwen ,wayeḍ wwin-t d sin acku sin-nni d atmaten , llan-t ugar n 3000 n thatimin, ma d aleqqem yezga yal aseggas . Deg unekcum n waggur n tuber azemmur ibeddu iɣelli-d seg tzemmrin ,ass i deg ttruḥun ttawin asdar, deg wass n 28 tuber neɣ deg umenzu n yemrayen i wumi qqaren “leḥlal”d akud i deg azemmur d lawan-is ad-yenfel imi n taylewt , akken kra n waggur d imuras n umuwan din i ttafen tagnit ad mεawanen akken yella deg wawal “ afus deg ufus , taεekkumt ẓayen ad t-ifsus” , yal wa s uxxam-is ɣur-sen ugar n 27 yixxamen . Tanezzayt zik ad d-akin ad heyyin alallen n umahil , yecban imeḥbaken , iswalen ,…Mi d-llin icciwen n tafukt teḍwa tafat i tɣaltin ufella yal yiwen yelha s usaḍur-is , zdin iɣallen ,aεeqqa amenzu yekcem ɣer taswalt, meslen yiwen unnar d win i tadukkli , d azdi , leqḍen-t beṭṭun-t d iswalen d aεcaṛ wa i umɣid , kra i txxamt n udris , neɣ siğğwen-t ttaɣen ayen yuqan deg uḥriq ,mi yebda uzizwu ifennu , tagella ad d-tres ɣer lqaεa ad derwen ɣef yiwen imekli , tettban-d taḍsa ɣef ugam-nsen , tellef tifawt deg wallen-awen ,win ur nekfi ara alqaḍ xeddmen-as tiwizi d anabaz ad yemmed leqdic-is ,igerdan ttaken-asen tiswalin timeẓẓyanin ttagen-asen timzizwer akken ad yili umussu anwa ara ad tt-yeččaren d amenzu d alɣuɣ ,win mazal ttawin-as-d amegda “kkiɣ-d sswada , wwiɣ-d imeqyasen ,kečč ay aneggaru a leḥna-k n tberda iɣeṛsen” tameddit n wass tasmuḍi mi ara ad d-teɣli , ad jamεen taffa n uzemmur ɣer yiswalen ad berken seg yixxamen, iḍ-nni inaragen ad d-zzin ɣer yiwen uxxam aqbur “axrib” ,ameslay ɣef uzemmur n useggas-nni yal aεeggal s tambaṭ-is ma yurew neɣ xaṭi ,imɣaren tbub tesnagt ttaken-d tamseɣara i temsalt yuglen , ttalsen-d tinafusin yesseḍsayen i d-yettaran taktawt ɣer deffir amek sεeddan timeḍḍirt-nsen. Akken ussan n uzewwi alma cerwen-ten , di taggra “Furar “ isalayen alqaḍ mi ara ğğuğgen-t, azemmur ad d-yaẓeḍ di lmεisra ttağğwen-d i umgassu azal 1800 litrat n zzit , llan kra flen akkin .Mi ara ad uɣalen seg uzaɣar d rrbeḥ, d nneεma , d aɣbalu n uwlaɣ, d ameɣlid , akken i d as-qqaren :” zzit n uzaɣar , d asɣun “.
Abdous Azedine