Ass n 10 meɣres 2019, i yebda ujerred n tudrin yebɣan ad ttekkint deg tezrigt tis sebɛa n temsizzelt n tezdeg Aïssat Rabah. Ma d ttiɛad aneggaru n ujerred ad d-yili ass n letnayen, 30 yebrir 2018. Annect-agi, yella-d mbeɛd mi temlal teseqqamut n tezdeg n Useqqamu aɣerfan n lwilaya n Tizi Uzzu, ddurt iɛeddan.
Anda msefhamen ɣef tallit n ujerred d yilugan imaynuten n tezrigt-agi. Ɣef wakken i t-id-iberreḥ Mass Sid-Ali Youcef aselway n tesqamut yettwakelfen s twennaḍt d tezdeg akked tdawsa deg Useqqamu aɣerfan n lwilaya n Tizi Uzzu.Tuddar yenwan ad ttekkint, ilaq fell-asent ad sersent zzmamat-nsent ɣer Useqqamu aɣerfan n lwilaya, uqbel 30 yebrir i d-iteddun.
Ma deg waggur n maggu d asawen, ad tebdu tufɣa ɣer tuddar ijerden iman-nsent, sɣur teseqqamut yettwakelfen s twennaḍt d tezdeg akked tdawsa deg Useqqamu-agi, i wakken ad ktazlen wa ad fernen ɣer sdat 10 n tuddar zeddigen i tezrigt-agi tis sebɛa. Ma ɣef umaynut n tezrigt-agi tamaynut, yenna-d umsasten-nneɣ belli, tudrin yebɣan ad ttekkint deg tezrigt n useggas-a, ur ḥwaǧent ara ttbut n tilin (agréments) n tseqquma n tuddar.
Zemrent ad ttekkint mebla annect-a, ilaq kan ad sersent tuttra neɣ asuter n uttekki ɣer useqqamu-agi i tt-id-yettheggin, syin akkin, ad sersen tiferkit n uttekki ideg ara yilin akk yisallen yerzan tudrin-agi yebɣan ad ttekkint. Ulamma llant tudrin ur neksib ara tiseqquma n tuddar, zemrent tddukkiliwin n twennaḍt ad ɛemrent tiferkit-nni n uttekki. Am wakken daɣen i d-yenna belli, tuddar yewwin arraz wis 6, wis 7, wis 8 d wis 9 akked wis 10 tezrigt iɛeddan, zemrent ad ttekkint deg tezrigt-agi, i wakken ad mḥezwaren ɣef yimeḍqan imenza.
Amek ara d-yili uktazal n tezrigt-agi ?
Ma si tama n tfelwit n uktazal, ad d-yili usenqeḍ ɣef 112 tenqiḍin. 25 tneqqiḍin, rzant aseddu n yiḍuman d wammus, ma d afran iwatan n yiḍuman ɣur-s 10 n tneqqiḍin. Aɛiwed n usexdem-nsen yesɛa 10 n tneqiḍin, xemsa-nniḍen (5) ɣef tarrayt n ujmeɛ n yiḍuman.
Imeḍqan uzyizen (publique), yecban tajmaɛt, imekwan n tizegzewt…atg ɣef 15 tneqqiḍin mačči 20 am useggas iɛeddan, ula d iberdan n taddart, ad ttwasneqḍen kan 20 n tezmilin mačči ɣef 25 am yilindi. Ma d imeḍqan n yidles d tmussni akked yisebdaden ɣef 12 tneqiḍin, areqqeɛ d uẓeggem ɣef 10 tneqiḍin, ma d xemsa-nni i d-yeqqimen i usnerni n taddart (aménagement).
Ad d-nesmekti kan imeɣriyen, belli timsizzelt-agi n taddart tazedgant, yettheggi-tt-id yal aseggas Useqqamu aferfan n lwilaya (APW) n Tizi Uzzu, ma d iswi-ines d acebbeḥ d usizdeg n tuddar n Leqbayel. D asebɣes dɣa i tuddar i d-yettifriren di yal tazrigt, yerna tura tuɣal d ansay, ttemɛanadent tudrin fell-as. Ɣer taggara maḍi, ad d-nesmekti belli tazrigt n useggas yezrin, d taddart n Azemmour Ou Meriem i yewwin arraz amezwaru, ma d tinna uqbel-is, d taddart n Tiferdoud i tt-yewwin d tamezwarut deg 2017.
Ghani Amazigh