Yal aselway n tɣiwant yewwi-d ad yelhu d tutlayt-is deg temnaḍt-is. Dɣa d ayen ay d-yellan ussan-a deg tɣiwant n Ayt-Smaɛel, imi ulac kra i izemmren ad d-yeḍru ala s lebɣi asertan (volonté politique) imḍebbren isertanen n temnaḍt gran asurif wayeḍ deg ubrid n weqdac i yidles d tutlayt tazwawt. S lferḥ d agaɛmir ay slan yimezdaɣ n Ayt-Smaɛel s umaynut n wesrusu n teplakin n uwelleh s tezwawt deg yiberdan, aya d tikkelt tamenzut i ara yili deg taddart segmi teffeɣ Faffa. Ahat annect-a imi wid yellan deg uqerru n tselwit n tɣiwant – ama s uselway ama s unmazul-is (vice-président) – d wid i yuḍnen aṭṭan n yidles akken i d aɣ-t-id-iwekked yiwet n tikkelt uneggaru-a i d-bedreɣ. Imḍebbren n tɣiwant n Ayt-Smaɛel wwin aya d anezgum, lhan-d yid-s, almi ttwasbeddent (ttwasṭalant) teplakin timezwura deg kra n yimukan, di laɛḍil ad tezzi nnuba i tamiwin tiyaḍ, ma neẓra belli llant tuddar d timeqqranin mazal ur tent-yeɛna usenfar-a, neɣ ad d-iniɣ ur ttwaḥuzant seg-s am taddart n Ayt-Tɛisiwt akked Weɣdir anida caḍen yimezdaɣ ɣef tuddar nniḍen. Amaynut-a deg yiberdan yettwasnubget s waṭas n tumert (joie) d usirem sɣur ilemẓiyen ismaɛlanen, ula sɣur wid i d-yettwaḍeggren seg uɣerbaz neɣ ur nesɛi axeddim deg tudert-nsen n yal ass, acku mi nesteqsa yiwen n wergaz ur newwiḍ 35 di laɛmer-is ɣef tmuɣli-s deg aya yenna-aɣ-d: » tidet kan, ferḥeɣ xilla seg teplakin-a i urant s teqbaylit, mačči d tamussni i ur ssineɣ abrid, besseḥ i tikkelt tamenzut ay ḥulfaɣ s yiman-iw akken ilaq deg tmurt-iw, deg wakal-iw imi i d lɛant-iyi-d teplakin s tutlayt-iw ». Axxam n tɣiwant n Ayt-Smaɛel mačči d amaynut fell-as leqdic d tallelt i yidles, ma neɛlem dakken tidukkla turmidt (active) n Wedrar n Fad tettaf ɣur-s ayen akk tebɣa ama d ayen yellan d tadrimt neɣ d allal, ɣas ma tesɛa tala n ddeqs-is s yimɛawanen d wid umu txeddem adellel (sponsors) . Nessaram akken ssaramen merra yimezdaɣ, ad ciḍen deg Ayt-Smaɛel warmuden d yiqeddicen i yerzan mačči ala aḥric n yidles maca ula d win n tneflit (développement) s umata, imi ilaq ad t-id-nini, ɣas ma yella aṭas n lecɣal i yettmaggan daha d dihin, wiyad qrib ad bdun, maca taddart n Ayt-Smaɛel txus deg ayen akk yerzan rraḥa n wemdan deg tudert-is, am yiberdan, internet d lgaz n lḥiḍ.
Mhenni Xalifi