Xas ulamma tamaziɣt d tutlayt taɣelnawt/tunṣibt, u xas ulamma yefka Useqqam Aɣerfan n lwilaya n Tizi Uzzu tadrimt i tɣiwanin i wakken ad smuzzɣen tawenniḍt, maca deg tilawt, drus maḍi maḍi i yerran deg ddehn-nsen asenfar-agi : ad as-tiniḍ ur ten-teɛni ara temsalt, neɣ am win i iceṭṭḥen i uderɣal. Gar tɣiwanin-agi i yesmuzzɣen tawennaḍt, ad naf d taɣiwant n Wat Yanni i yeṭṭfen taqacuct, deffir-is kan, tezga-d tɣiwant n Wat Bumehdi. Deg umḍiq wis tlata, d taɣiwant n Tizi Uzzu, ma d wis rebɛa, d taɣiwant n Tirmitin. Aya, ɣef leḥsab n yigemmaḍ n Temsizzelt n timmuzɣa i yexdem Useqqamu Aɣerfan n lwilaya aseggas-agi, anda yerza ɣer 67 n tɣiwanin n lwiaya n Tizi Uzzu. Yella-d uktazal ɣef tira s tmaziɣt, am yisem n tɣiwant, ismawen n yimḍebbren, ismawen n tudrin, leqdic d yirmuden, asuddes n leqdic adelsan, tuddsa tussnawiyin akked tmeɣriwin n wansayen…atg. Ma nger tamawt ɣef yigemmaḍ n usemres n tmaziɣt (asemmad-sondage), ad naf 100% n tɣiwanin akked yiɣerbazen ilemmasen, ttwarun yismawen-nsen s tmaziɣt ; 95% n yiɣerbazen imenza, tisnawin, iɣsuren n yidles akked yixxamen n yilmeẓyen ; 71 % deg waddad aɣarim ; 68 % ismawen n tudrin ; 35% n tnazzant (lbusṭa) ; 20% n lbankat ; 10% n ttawilat n umesni…atg. Akken yebɣu yili lḥal, mazal iḍul umecwar. Aseqdec n tutlayt deg yal aḥric n tudert dayen ara d-ixelqen imekwan n uxeddim i wid i d-itteffɣen deg ugezdu n tutlayt d yidles n tmaziɣt deg tesdawit Mulud Mɛemmri. Akka kan ara idiren s tmaziɣt, i tmaziɣt, mačči ad ttmettaten kan ɣef tmaziɣt.
Hocine Moula