Aṭas n tudrin n leqbayel i d-yeggaren Anẓar, yal tikkel mi ara tili lqaɛa yeṭṭef-itt uɣurar, ssuturen deg-s i wakken ad asen-d-yefk ageffur ad swent tfarkiwin-nsen. Yella unsay-agi si zzman n zik ɣar tmetti taqbaylit. Yettili-d s ucebbeḥen n uɣenja am teslit, ad t-fken i warrac imecṭaḥ, ad d-zzin i tzenqatin n taddart s ccna-agi : « Anẓar, Anẓar a Rebbi seww-itt ar aẓar, ad teww nneεma n udrar, ad ternu tin n uzaɣar ». Dayen i ssutren ula d imezdaɣ n taddart n At Sɛid (Maɛyac), i d-yezgan di tɣiwant n Mizrana, dayra n Tegzirt.
Maca, nutni xtaren aya s tmamekt -nniḍen, tagi d yiwet n lweɛda i d-ǧǧan lejdud-nsen ugar n 700 n yiseggasen-aya ɣer deffir iwumi ssawalen « Nwal » i d-yettilin deg yiwen umekkan i d-yegan di tiɣilt, iwaɛan ɣer lebḥar iwumi qqaren Tawwurt n Mḥend Uḥend. Amekan-agi, yesɛa azal d ameqqṛan ɣar yimezdaɣ n taddart-agi, acku yekcem deg umezruy n tmurt n Lezzayer. Llan-d, eg-s, waṭas n yimennuɣen di tallit-nni n Ṛuman , n Ṭurk, n Fṛansa…atg.
Gar-asen win i d-yellan akked Yiṭurkiyen,deg useggas n 1 825 anda mmuten azal n 300 n yimjuhad. Taṣebḥit n wass-nni n sem, 21 furar 2020, heggant tlawin n taddart aɣṛum aquṛan, taḥbult , lexfaf akkedtgella-nniên, syin ṭṭfent abrid ɣer umekkan, ceɛlent-as ticemaɛin, ɣṛant-d lfatiḥa. Azekka-nni, swejdent-d tibaqiyin n seksu, sseččent yal win i d-yerzan. Ula d wid ur d-nruḥ, yewweḍ-asen ɣer yixxamen. Dɛant ɣar sidi Rebbi, ad tili lweɛda-agi d tin yettḥaraben, ad yekkes takawt wa d-yefk lehwa, ad sswent tebḥirin.
Yacine Meghzifene