Aṭas n Yiqbayliyen i yuttunagen ɣer tmura tiberraniyin tallit-a taneggarut, abeɛda ɣer Fransa, Kanada d Marikan. Ɣef leḥsab n kra n yisallen i d-yeffɣen di tɣamsa n tmurt n Kanada, yettnerni yal aseggas umḍan n berruyat d yikaramen n teɣdemt gar yibusinen (couples) i yettruḥun si Tmazɣa, neɣ i yesɛan lasel d amaziɣ. Ɣef wawal n kra n yimazzagen ɣef tlufa n tmetti, tasebba tamezwarut i d-yeslalayen ugur gar sin yemyercalen di Kanada, tcudd ɣer yidles. Meḥsub, yeḍḥa-d umgarad n yidelsan d aɛewwiq amezwaru gar urgaz d tmeṭṭut-is, ulamma bɣan tamurt-nni, ɛemmden ad idiren deg-s.
Ad ǧǧen akal anasli akken ad idiren tudert i walan telha ugar, ideg yella uzref, tadrimt d talwit, ɣer taggara ad d-ggrin deg wuguren d yiɣeblan igeɛmura ula daxel twacult. Abeɛda ma yella liḥala-nsen tinmettit urɛad terkid. Am wakken yella daɣen wugur n ddin, i icudden ɣer wamek yenṭeḍ ɣur-s urgaz neɣ d tameṭṭut d wamek tella tudert d usaḍuf di tmurt n Kanada, amedya taluft n tegdayt (égalité) gar urgaz d tmeṭṭut. Ɣef wakken i d-tenna teɣbalut-a, aṭas n tlawin i yettsenniden ɣef usaḍuf n Kanada akken ad sɛunt izerfan ur sɛint di tmurt-nsent tanaslit, neɣ ma ulac ad ssutrent nutenti berru, ad bḍunt akked yirgazennsent.
Amedya-nniḍen d win n lḥiǧab, ma yella yugi urgaz ɣef tmeṭṭut-is taqbaylit ad t-teg, nettat ad d-tini « Aya d azrefiw », ma yella d anemgal, kifkif. Syin, war aɛeddi ɣer umsefham s teɣẓint, ad d-yeḍru berru, ad d-ggrin warrac am yigujilen s yimawlan. Ayen i yessawalen i wugar n uxemmem, imi uguren-a i d-yettilin gar sin n yimyercalen di Kanada, tikwal ttawin ɣer ubaxix am win i dyeḍran imalasen yezrin di Montréal gar sin n Yiqbayliyen i yemsebran, rnu sɛan arrac. Argaz-nni iga awezɣi, mi yenɣa tameṭṭut-is d warraw-is, syin ikemmel iman-is.
M. K.