La trekkem deg Ssuq n Lḥed tamdint i d-yezgen deg tɣiwant n Timizart, daira n Wagnun. Ssebba ? D afraq n 190 yixxamen yettwabnan deg umkan iwumi qqaren Aḥriq Uεaṭṭar. Deg tiɣri i d-iger Mass Mḥala Lwenas aselway n tɣiwant-a, deg yiwen n wulɣu i iεelleq merra deg leqhawi akked yizenqan n Ssuq n Lḥed, yettban yeɣli-d yiwen n leḥris meqqren ɣef tseqqamut ara iferqen ixxamen-agi, acu yeǧǧan amur ameqqran n yiεeggalen-is ur ḥudren ara di leqdic-ines. Γef waya, ula d Mass Mḥala Lwenas yejbed-d iman-is di ccɣel-agi, imi am wakken i d-yesfhem yugi ad yili d le bouc émissaire n yiwet n txazabit i d-yettwaheggen sɣur aṭas n tamiwin akken ad as-simsen, imi llan wid yebɣan ad yili ufraq n yixxamen-agi s tudmawin. Rnu ɣer waya, yella yiwen n yiccer n lkaɣeḍ ur nettwastenyi ara, yuzzlen aṭas deg wussan-a gar yimdanen, yerra lewhi ɣer kra n yimeɣnasen n yiwen n ukabar yesεan afud meqqren deg l’A.P.W n Tizi Wezzu. Iccer-agi n lkaɣeḍ yesneεmel d akken d nitni i yellan deffir leḥris-agi i d-yeɣlin ɣef tesqqamut n ufraq n yixxamen-agi. Anwa yesεan lḥeqq anwa ur t-nesεi ? anda-tt tidet anda-t lekdeb ? D ussan kan ar aɣ-t-id-yemmlen ! Ssya ɣer yimir, yal wa yegguni amek ara tefru taluft-agi ur yurǧa ḥedd. Ixxamen nenwa ad d-awwin lehna ziɣ ttheggin i ccwal. Ar melmi ?
Ait Slimane Hamid