Iban-d tallit-a taneggarut, simmal yettnerni urebbi n yiyuẓaḍ di tudrin n Tmurt n Yiqbayliyen. Seg tikkelt ɣer tayeḍ, ad d-yennulfu yimrebbi amaynut, abeɛda seg wid yesɛan littaɛ, neɣ kesben akal sdat ubrid. Tuget seg-sen, ad d-aɣen imeyyaten n yičewčwen, ad ten-id-sekkren armi ɛaden d iyuẓaḍ, imir-n ad ten-senzen i wid i d-yesteqsayen. Ma d drusit-nniḍen, ttaɣen-d timellalin xeddmen-tent di tmacinin akken di kra n wakud, ad d-ffɣen d icillawen. Iyuẓaḍ-nni d wid iwumi qqaren « iyuzaḍ n trisiti », meḥsub teffɣen-d s wudem amacinan, mačči d tayaẓiḍt i izeddlen fell-asen.
Yesḥissif lḥal imi di tarrayt-a n wid yesnuzuyen iyuẓaḍ, yal mi ara d-yeffeɣ učewčew mačči d awtem ad t-nɣen acku, ɣef leḥsab-nsen, ur asen-d-sekcamen ara tyuẓaḍ idrimen di ssuq-nsen. Ma nemmeslay-d ɣef ssuma i semrasen yimsenza deg unẓul-asamar n Bgayet, am Tsexriwt d Ayt Smaɛel d Yiderginen, nezmer ad d-nini qrib ɛedlen seg umsenzu ɣer wayeḍ. Imi asiḍen s taẓayt, llan wid i d-yessuturen ssuma n 350 n yidinaren i ukilu, wiyeḍ 330 n yidinaren.
Yewwi-d ad d-nesmekti d akken smenyifen yimezdaɣ s umata ifrax ara yemmezlen sdat-sen akken ad ttyeqqnen belli ur yelli yettwaxemmel deg walbaɛḍ n yimsismaḍ uksum ara d-aɣen. Abeɛda imi aṭas i yellan d ccekk ɣef yiyuẓaḍ i d-yettasen si lebɛid. Ɣef waya, ḥeṭṭren ula i tigawt n usencew send ad t-awin s axxam. « Nekk ttaɣeɣ-d kan iyuẓaḍ ara yezlu bab-itsen sdat-i. Ula d wid n rruṭi, ḥebseɣ aččay-nsen di temdint seg waṭas-a », i d-yenna yiwen n yimḍebber n twacult. Ilaq ad d-nini mačči d ayen isehlen umaḍal-a n urebbi n yiyuẓaḍ, tugart di twala n usemmiḍ, maca teffɣen yimrebbiyen-nsen ɣer taggara mi ara sɛun imsaɣen.
M. K.