Yeṭṭuqet wawal ussan yezrin ɣef tukeṛḍa i yeḍṛan di Xeṛṛaṭa deg wadeg iwumu qqaṛen EPLF. D yiwen n yilemẓi qqaṛen-as S.Y, seg temnaḍt-nni, i yesεan 22 n yiseggasen kan di leεmeṛ-is. Aneggaru-a, yekcem ɣer yiwet n lbuṣṭa, yeffer udem-is, yessuter i uxeddam ad as-d-yefk idrimen akk yellan ɣur-s. Γas ma yella di tazwara yugi-as, lameεna yekkes-d kan ɣuṛ-s lmus ameqqṛan, yugad uxeddam-nni, yuɣal yeǧǧa-t ad yexdem ccɣel-is. Γef leḥsab n wawal i d-yeffɣen, amukar-a, yeṣṣaweḍ yuker ugar n 70 n yimelyunen, yerwel imir-n.
Seg tama-nniḍen, yella win yesxebṛen iɣallen n laman, dɣa ḍefṛen-t dindin. Imi yufa iman-is yettwaḥzeq sɣur yiɣallen n laman n Xeṛṛaṭa, amukar-a, yefren ad d-yerwel seg ubaṛaj n « Iɣil Umda » , s ttawil n lεum, i wakken ad yelḥeq i taddart n » Buzyan » di Draε Lqayed. Seld azal n sin n yesragen, iɣallen n laman ttεassan-t, armi i t-id-ṭṭfen. Ma yella d idrimen-nni, rran-ten-id, meεna bezgen akk. Seg tama n uqcic-a, sbedden-t di teɣdemt n Xeṛṛaṭa, di leεḍil ad ḥekmen fell-as.
K. K.