Asenfar n useggem d tduli n wannaren, yeffeɣ-d i waṭas n tɣiwanin tallit-a taneggarut, gar-asent taɣiwant n Yiderginen i d-yezgan s tebɛed n wazal n 45 n yikilumitren ɣer Usamar n Bgayet. Dɣa, seld kra n uɛeṭṭel i icudden abeɛda ɣer lexsas n tedrimt, qrib yekfa usenfar s timmad, n tduli n unnar agejdan, imi temmug yakan tduli. ‘’Tura akka, nezmer ad d-nini amur ameqqran n lecɣal yemmug meskud qqimen-d kan sin. Yettusemma, tura mi nessa taduli i unnar, yeqqim-d kan usbedd n yijqa n tafat akked cwiṭ n ureqqeɛ daxel n unnar », i aɣ-d-yenna yiwen seg yimḍebbren n tɣiwant n Yiderginen. Yewwi-d ad d-nini xussen ayendin yimeḍqan d tzeɣwa ideg zemren ad d-sbeyyinen tizemmar-nsen yilemẓiyen n tɣiwant-a n Yiderginen, ama d ayen yerzan ɣer uḥric n waddal, isilaɣ, ɣer yidles d yiḥricen-nniḍen. Ɣef waya areqqeɛ n unnar-nsen aɣiwan i d-yezgan di tlemmast n Yiderginen, ad ten-yeǧǧ xersum ad ssemrasen addal n ddabex n uḍar s wugar n rraḥa d tɣellist. Tugart-tugart ma neẓra belli deg wayaqeddac, llan ur ttheyyin s waṭas tiberziwin (tournois) acku ur sɛin annar iwulmen, neɣ ma heyyan-d ad d-heyyin anda-nniḍen. « Aṭas-aya nettraǧu annar-nneɣ deg waddad igerrzen am wa. Tura yella wamek ara nesṭuqqut seg warmuden inaddalen. D ayen iseg ara d-sfaydin ama d arrac imecṭaḥ neɣ d ilemẓiyen », i d-yenna yiwen seg Yiderginen. Ad d-nesmekti d akken yeffeɣ-d usenfar-a i tɣiwant n Yiderginen s yidrimen n wayen iwumi qqaren FCCL. Yekker-d s wazal n 43 n yimelyan n dinar, neɣ ugar n 04 n yimelyaren n santim. Deg-s, gar cwiṭ n waṭas, taduli n unnar s ugazun, abnaw n ufrag d tseddarin, asbedd n unagraw n ujmaɛ n waman n ugeffur, asbedd n tafat d ubnaw n texxamin n usteɛfu d ucuccef.
M. K.