Tafugla n ufraq n warrazen n tezrigt tis 7 n temsizzelt Aïssat Rabah n tezdeg, tettwawxer ɣer seldazekka n larebɛa, 06 unbir 2019. Ssebba n usended n tkunfidiralit n ssandikat timunanin (CSA). Niqal tettuɛeggen tfugla-agi i wass-nni n letnayen, 28 tuber 2019, yuɣal ẓuẓen-tt yimsuddsen-is ɣer wass larebɛa, ɣef 10h00 n ssbeḥ deg Uxxam n umezgun Kateb Yasin n Tizi Uzzu. D ayen swayes i d-iberreḥ wulɣu n Useqqmu Aɣerfan n Lwilaya n Tizi Uzzu. Ma ɣef tḥawact n tezrigt-agi n useggas-agi, nnan-d belli amḍan n tuddar yettekkan deg-s yuder-d ɣer 57 n tuddar.
Imi deg tezrigt tis setta, 101 n tuddar i yettekkan, maca aseggas-a yenqes umḍan-as s wazal n uzgen. Yerna gar 57 n tudrin yettekkan deg tezrigt-agi, llant 24 deg-sent d tid ara yemḥezwaren ɣef warraz-nni amaynut n tuddar i d-yufraren yakan deg tezrigin iɛeddan. Ula d tallit n ujerred ɣer tezrigt-agi, sɣezzfen-as yimsuddsen-is snat n tikkal. Imi tallit tamezwarut n ujerred n tudrin yebɣan ad ttekkint deg-s, tella-d seg 10 meɣres 2019 armi d 30 yebrir 2019. Syin akkin, swexren ttiɛad aneggaru n ujerred ɣer wass n, 30 yebrir 2019.
Di taggara, gan ass n 20 yulyu 2019. Ahat d amḥerkel-agi aɣerfan i d-yellan deffir n waya. Imi taseqqamut yettwakelfen s twennaḍt, tezdeg akked tdawsa deg Useqqamu-a, tessashel merra ttawilat i tuddar yenwan ad ttekkint. Ilaq fell-asent ad sersent zzmamat-nsent ɣer Useqqamu Aɣerfan n Lwilaya; ideg tella kan tuttra n uttekki akked taččart n tferkit n uttekki. Maca akkenni, yerna ur ttwajerdent ara aṭas n tudrin.Ma ɣef umaynut n tezrigt-agi tamaynut, yetturaǧu ad ttwaferqen 10 n warrazen ɣef mraw n tuddar ara d-yufraren.
Ala xemsa-nni n tuddar timezwura n tezrigt iɛeddan, i izemren ad ttekkint deg tedwilt-agi tis 7, ma d tuddar yewwin arraz wis 6, wis 7, wis 8 d wis 9 akked wis 10 tezrigt iɛeddan, ur zmirent ad ttekkint deg tezrigt-agi. Am wakken daɣen, i d-slalen timḥezwert “Best off” n tezdeg, ara d-yilin gar 5 n tuddar i d-yufraren deg semmus n tezrigin timenza, si tmezwarut-nni n 2006 armi uqbel taneggarut-agi, tinna n 2017. 10 n tudrin ara d-yufraren deg tezrigt-a, ad awint tadrimit ara yilin gar 2 000 000 alamma 9 000 000 n yidinaren. Ɣer taggara maḍi, ad d-nesmekti belli tazrigt n useggas yezrin d taddart n Azemmour Ou Meriem i yewwin arraz amezwaru, ma d tinna uqbel-is d taddart n Tiferdoud i tt-yewwin d tamezwarut deg 2017.
Ghani Amazigh