Yubasin, neɣ Ɛisat Milud, lasel-is n Yiɣil Ɛli, maca ilul di Wehran ass n 13 unbir 1967, acku tawacult-is tettruḥu ɣer Wehran, tettuɣal-d ɣer Tmurt. Isem i as-tefka twacult-is, yeddem-it ɣef jeddi-s i yemmuten d amjahed. Yeɣra u yesɛedda Yubasin temẓi-s di taddart n Tqurabt akked kra n yimeddukkal, gar-asen Ḥmed Leḥlu, Uleḥlu Buxalfa d wiyaḍ. Segmi yella d amecṭuḥ, iɛerreḍ ad yecnu, weḥd-s neɣ akked yimiddiyen di lexla, ad yessefru, ad yurar ssnitra, ad d-yeg aẓawan.
Deg 1985, yuɣal ɣer temdint n Wehran, anda i d-yemlal aṭas n yinaẓuren d yimeɣnasen, am yimedyazen Ɛebdella Munnah d Ǧerraḥ Uremḍan, ameɣnas Ɛebdella Ḥaman, amaru Ǧamal Benɛuf d ucennay Racid Lɛubi. Deg useggas n 1986, yebda ixeddem timeɣriwin di tesdawit n Wehran, syin yekcem ɣer terbaɛt iwumi qqaren « Aɣerrabu n tmedyazt isefra ». Mi d-teffeɣ s annar tddukkla Numidya n Wehran, yettekkay seg tikkelt ɣer tayeḍ deg wahil-is, mi ara as-d-ssiwlen. Armi d 1989, yessekles tasfift-is tamenzut s uzwel n « Imeṭṭi n ugujil ». Imir-nni, iɛedda-d i tikkelt tamenzut di tiliẓri n Tmurt n Lezzayer. Deg 1991, yella seg wid i d-yesbedden tiddukkla Asirem n Wehran, akked Kamal Nayt Zerrad, Ɛebdella Ḥaman d wiyaḍ.
Seld tisullya-s di Tmurt, yexdem aẓeṭṭa n tqecwula (vannerie), imi d anaẓur i iḥemmlen mliḥ allalen-nni n zik. Syin, deg 1999, yessekles tasfift-is tis snat, am wakken yella d imesbeddi n tddukkla « Tala n tmaziɣt ». Mi d-teḍra Tefsut Taberkant n 2001, yerna-d tasfift-nniḍen iwumi isemma « Tilelli », ideg yerra tajmilt i yimeɣrasen iqbayliyen. Seg 2006, iqeɛɛed iman-is akked twacult-is di Tmurt. Seg tikkin deg tfaskiwin n tmedyazt d tfuggliwin n yimulliyen imaziɣen, yuɣal-d deg 2011, s uḍebsi wayeḍ, izewwel-it « Timanit ». Tura akka, a-t-an la yettheggi album amaynut, ara d-yeffɣen imalasen i d-iteddun. Yubasin d win iḥemmlen taẓuri, i yebnan amennuɣ-is ɣef teqbaylit d tmaziɣt, d useḥbiber ɣef yidles-is.
M. K.