Tettwassen tdayṛa n Xeṛṛata s teqseḥ n yiṭij dinna, d lḥamu i iqeḍḍεen ula d nnefs i kra n yimdanen i ihellken aṭṭan n ddiqan. Ayagi, tamentilt-is d abaraj i yellan deg-s, dɣa yerra tamnaḍṭ-nsen d tin iṛeḍben mliḥ, teččuṛ d talɣemt (humidité), ula d abeḥri ixuṣ. Rnu i waya, lexṣaṣ n yimɣan d ṭṭjuṛ, ladɣa deg temdint.
Daymi i ttkukrun yimezdaɣ-is, d wid i d-irezzun ɣur-sen anebdu, acku tettiwεiṛ fell-asen tudert, ladɣa ixeddamen i ixeddmen i tafukt. Ɣas ma yella temsalt-a n rɣu ur telli d tamaynut fell-asen, yerna d lawan-is, imi deg unebdu i nella, lameεna lḥamu n wussan iεeddan, yerra-asen ussan d iberkanen.
D ayen i yeǧǧan amur ameqqṛan deg-sen qqimen deg yixxamen. Tiṣeddaṛin n lḥamu i yugaren 40, beddlent ula d aselḥu n kra n temsal, am tin n lɣiṛan i yellan gar Lberǧ n Mira akked Xeṛṛata. Aredmani deg uḥric wis kṛaḍ n yifula (lɣiṛan), inehhaṛen i d-yettasen seg Bgayet yettwaldi-asen ubrid seg ugama (Ɛecba), tura deg waddad-a n lḥamu, ula d wid i d-yettasen seg Ṣtif ttεeddayen-d syin-a seg tama-nniḍen n webrid.
Acku, ama d inehharen, ama d wid iteddun yid-sen, sεeddayen azal n 20 armi d asrag n wakud, neɣ ugar mi ara d-yili leḥṛiṣ n tkeṛṛuṣin daxel, war nnefs yezdigen. D tidet tagnit-a tḍuṛ-iten akk, meɛna ulac wid yenḍeṛṛen aṭas am yimɣaṛen, d yimuḍan i yesḥassfen mliḥ seg waddad-a. Ɣef usentel-a, yenna-aɣ-d yiwen n umɣaṛ : «Limer kan qqimen yiberdan am zik, win ur nezmir i ufalu ad d-iεeddi seg ugama. Ma d tura neḥṣel neqqim, ula d abrid yekfa, ula d ttawil yelhan ur yelli. Nessaram xeṛṣum, ad kfun lecɣal n yiberdan-agi imaynuten s tazzla».
K. K.