Mazal aɣbel n yiguduyen, ttzelligen deg wudem n temdinin n tmurt n Leqbayel. Ɣas ma yella-d lḥir meqqren seg kra n tddukkliwin n useḥbiber ɣef twennaṭ deg yiseggasen-agi ineggura deg temsalt n tsertit n tezdeg d ugerrez n wudem n temdinin, maca mazal kra n yimdanen ur nḥarwan ara deg temsal i icudden ɣer tezdeg n yizenqen-nsen, ɣer yidis n kra n yimḍebbren n tɣiwanin, yefkan afus. Dɣa s ddaw n Uxxam n tɣiwant n Mεatqa, yiwen ugudu s trawnaṭ meqqren, yellan deg ubrid yettawin gar-s akked dayra. Rnu wayeḍ ɣer lbusta i izelgen s waṭas udem n temdint-agi n Mεatqa.
Agudu-agi, i d-xeddmen yimezdaɣ n yixxamen i d-yezgan rrif n Uxxam n tɣiwant, dayen i d-yettaken yiwet n tikdi (odeur) iwumi ur yezmir umdan ad tt-yesriḥ. Aya, yezmer ad d-yeglu s yimihal ɣef tdawsa n yimezdaɣ d yimsebriden. Rnu ɣef waya, dayen ara d-yeglun s yibaxixen ɣef twennadt. Deg waggur kan iεeddan i d-yessuddes Useqqamu Aɣerfan Aɣiwan n Mεatqa d tddukkla Yennayer n taddart n Isewwaqen, yiwet n tcemelit n usizdeg n tlemmast n temdint-agi, anda wenεen yakk izengan n tɣiwant, maca s kra n wayen yettwaxedmen, yuɣal akken yella. Ar melmi, ad tekkfu taluft-agi n yiguduyen s trawnaṭ ? Amecwar mazal-it ɣezzif, tisegmi tettwaεgeb i lebda.
A. Z.