Tutlayt akken yebɣu lḥal atteqim d ttutlyat, mači d-aɣbel. Yelha i wemdan akken ad yissin akk tutlayin n-umaḍal. D-acu kan, asmi ara attres deg weḥric n t’sartit tettuɣal dayen nniḍen. Dayen yaɛnan tutlayt taɛrabt deg t’murt nneɣ. Adabu seg wass n timunent ar ass-a yesnulfa-d tasertit n-uɛareb. Tasertit-agi « teḍla » ɣef t’metti nneɣ, ama deg uɣerbaz neɣ deg weḥricen nniḍen. Akken ẓran wid i faqqen i t’sertit-agi n-udabu, iswi-ines d-aɛerreb n weɣref Amaziɣ, acku ur yettmeslay ara tutlayt n-udabu. Tikta n « el umma el ɛarabiya » tewwi abrid-is…Arrac imaziɣen uḍenen deg yiɣarbazen. As-tini-ḍ ttidiren snat n tudartin. Deg wexxam, neɣ deg berra ttmeslayen s teqbaylit, ma deg yiɣerbazen ttbeddilen tutlayt akken ad meslayen s taɛrabt. Akken i ngar tamawt, arrac nneɣ uɣalen garen-d aṭaṣ n yimeslayen s taɛrabt, cennu-n cna s taɛrabt, llan kra zemren ad ak-inin: » d-acu-tt akka tamaziɣt-agi? ». Ayagi yusa-d seg t’sertit n-uɛarreb! Adabu ur yaḥbis ara dagi kan, yewweḍ alarmi id yesnulfa yiwwet n lɛefsa akken ad « yemḍel » aɣref Amaziɣ. As mi yewweḍ ad « izaɛzaɛ » allaɣen n warraw nneɣ s t’sertit-agi n-uɛarreb, yewwet lsas n t’metti taqbaylit s yiwwet n tikli yecban tin n lafɛa. Aɛerreb yewweḍ tura ɣer yimɣaren d temɣarin nni ur nekcim laɛmar nsen ɣer uɣerbaz. D wigi kan id yegran deg t’metti nneɣ ttmeslayen taqbaylit yeṣfan, s tikta n teqbaylit n zik. D wigi id yegaren lemɛun lakked d yisefra n Si Muḥ Umḥand, lakked Ccix Lḥusin, tagi d Tassekla taqbaylit taqburt, tin ur lemden ara warraw nneɣ deg uɣerbaz aɛrab! Lukan mazal Muḥya ad yini : » Ah a ddin uqabac ! ». Akka, myal aseggas, iɣerbazen ssawalen-d i yimɣaren akk d temɣarin akken ad lemden tira d-umeslay n taɛrabt. Tagara-agi, ssiwlen-d deg taddart n Tuɣezza, id yezgan deg t’ɣiwant n Cerfa deg lwilyaya n Tubirett, timɣarin akken ad ruḥen-t ad mmarkin-t iman-nsen-t deg uɣerbaz akken ad lemden-t taɛrabt ! Akka ihi, timɣarin nni tiḥninin i ḥarzen taqbaylit n lejdud ad ruḥen-t ad lemden-t taɛrabt ɣer tagara llaɛmar nsen-t, akken « ad s’hetrifen-t » s tutlayt n El Mutanabi ! Nutenti yennumen isefra n zik nni lakked d timucuha, ad bedlen-t tikta akk d yidles i yiles ! N’na zwina attelmed « ellif d-elba », netta-t yennumen tettgalla s « waḥeq n Sidi el mufaq » ? N’na Ǧeǧiga attaru « baba » d « mama » s taɛrabt, netta-t tennum t-cerru azemmur akken at ssisen zzit d yiniɣman? N’na Megduda yennumen icewiqen s taqbaylit attecnu « ṭalaɛa elbadru ɛalayna » ? Ṛuḥ a a taqbaylit ṛuḥ…
Syphax.Y