Ihegga-d Uɣlif n usedwel aɣelnaw timlilt taɣelnawt n usileɣ i lfayda n yiselmaden imaynuten n tmaziɣt (aɣerbaz amenzu, aɣerbaz alemmas d tesnawit). Teḍra seg wass n 01 alamma d ass n 15 deg yulyu 2017, deg uɣerbaz alemmas Atmaten Drir n Leqser– Bgayet. Tannant-a, tesdukel 68 n yiselmaden n twilayin n Lezzayer merra – usan-d ula seg tneẓruft. Deg-sen, 33 n uɣerbaz amenzu, 18 n uɣerbaz alemmas, 17 n tesnawit. Melmi i kfan ussan-nsen n usileɣ, ad bḍun ɣef yimukan n uxeddim ay d-yeldin aseggas-a deg kra n twilayin ideg tettuselmad yakan tmaziɣt akked tid-nniḍen d timaynutin ɣer temsalt-a. Taseqqamut n tikkelt-a, terza tiwilayin n Bgayet, Tizi-Uzzu, Tubiret, Bumerdas, Lberǧ, Sṭif, Batent, Tibeskert, Ilizi, Blida, Clef, Iɣil Izan, Msetɣanem, Wihran, Tisemsilt, Sidi Belɛebbas akked Tbessa. Deg tannant-a, d imaswaḍen n tmaziɣt ay ufan yimunan-a deg unnar, ṭṭfen-asen afus. « Amahil yella s lbenna imi yedda s tegmat d teflest, d iselmaden i iqedcen, d nutni i ittnadin, ferqen imanen-sen d igrawen suffɣen-d isenfaren. Ddren ayen ara slemden. Walan, ddren tasnegmit s yisenfaren (la pédagogie de projet), mačči d awal kan. Tannant tɛedda deg tegnatin yelhan ɣas akken azɣal yesfunzur alɣem », i aɣ-d-yenna umaswaḍ Ali Boufrouche. Ula d iselmaden si tama-nsen, cerhen mačči d kra. Tamsiwt Teguig Naima d taselmadt n tmaziɣt, d taɛrabawalt n Clef, tesnemmer aṭas imsilɣen d yiselmaden n tannant. Tenna-aɣ-d : ’’Deg tannant-a, ufiɣ-d atmaten i yi-d-yefkan tayet d wafud , wwiɣ tamussni, tarrayt d tmussni n yimdanen. Sɛiɣ zher imi d tamaziɣt i ɣriɣ, imi d tamaziɣt ara slemdeɣ. Ad d-ssakiɣ tamaziɣt yettwattun di temnadt-nneɣ di Clef, ncallah ad tnerni, wa ad teǧǧuǧeg’’. Massa Loukkad Kahina, seg At Ziki, ad tselmed tamaziɣt di lwilaya n Msetɣanem. Tenna-d : ’’Ḥareɣ melmi ara qableɣ inelmaden-iw, melmi ara kecmeɣ s aɣerbaz, ur ttḥulfuɣ ara kan i yiman-iw d taselmadt, ttḥulfuɣ sɛiɣ taɣḍaḍt (mission) d tameɣdaḍt ara d- yeskeflen tajaddit. Di tazwara, d tidet tekcem-iyi cwiṭ n tugdi, skud ttɛeddayen wussan di tannant, iwellihen n Mass Boufrouche rennun-iyi-d tabɣest, serwalen tugdi nni”. Mass Gheouar Bilal Seg Ukefadu, netta ad yesselmed di Wihran. Yufa tannant-a “tessawḍaɣ ad tsemlil aṭas n yiselmaden, myussannen, mmeslayen s telqayt ɣef taɣult n uselmed”. Ikemmel yenna : “ Nedder am yiwet n twacult , tezga deg yimawen-nneɣ teḍsa d ucmumeḥ, awi yufan tannant-a d tin ur nettfaka ara. Ɣer taggara, nessaram ad nili d wid ara d-yessiɣen tiftilin-nniḍen i tutlayt n tmaziɣt, akken ad taẓ ɣer sdatdeg umalu n tmurt n lezzayer”. Tezzi tannant n ubrid-a ɣer tiram n ulmud n yinelmaden, ɣer tarrayin n uselmed akked yizerfan n uxeddam. Tannant n 2017, akken I tt-walan yimekkiyen, tewwi-d aṭas n lfayda, ama deg wayen yeqqnen ɣer tarrayin n uselmed, ama ɣef tmussni n yiberdan n ulmud n unelmad d tin n yizerfan. Aya yusa-d yeshel ɣef yiselmaden imunan, yejbed-iten umahil, ɣas weɛrit tegnatin n tudert, ẓẓay wakud ideg teḍra tannant. Imekkiyen merra, rran ssebba n waya ɣer tpidagujit n usenfar i asen-isettun aẓɣal n unebdu d tmes i d-yezzin i yidurar n Leqser.
B. Benhamouche