Tberḥ-d ussan-agi iɛeddan Tenmehla n usegmi n lwilaya n Tizi Uzzu, belli tuget n yinelmaden n uswir n tesnawit i ilaqen ad ɛiwden akayad n taggara n ulmud asnawi, yettwasnen s yisem n BAC, ugar n uzgen n yimjerden i tezrigt-agi tuzzigt, ur ɛawden ara asɛeddi n ukayad-agi. Ma d timental ur ẓrin ara acimi, akka i d aɣ-d-yenna yiwen n yimḍebber deg Tenmehla n usegmi. Tazrigt-agi tis snat i d-yellan seg 13 alamma d 18 deg waggur-agi ideg nella, jerden iman-nsen azal n 2963 n yinelmaden n lwilaya n Tizi Uzzu. Amur ameqqran n yinelmaden-agi ur d as-nɛawed ara asɛeddi i ukayad-agi, d imunan, wid ur neqqaren ara deg tesnawit. Inelmaden-agi i iɛawden asɛeddi n ukayad-agi, ferqen-ten ɣef 9 n wulmisen n yikayaḍen, yellan deg tlemmast n temdint n Tizi Uzzu. Am wakken daɣen i d-llan ɣef lmendad-nsen wazal n 1 000, gar yiselmaden akked yimɛiwen n usegmi. Aseɣti n tferkiwin n yinelmaden, yebda tasebḥit n wass-nni n lexmis 20 yulyu 2017, deg sin n wulmisen n useɣti, i yellan d snat n tesnawiyin deg temdint n Tizi Uzzu. Tigi d tasnawit n Fatma n Soumer akked tesnawit n Abbane Ramdane n temdint tamaynut. Tallit n useɣti, teqqim kraḍ n wussan, imi seɣtan yiselmaden ula deg taggara n ddurt. I uzekka 25 yulyu 2017, yetturaǧu ad d-binen yigemmaḍ n ukayad-agi n uswir n tesnawit, deg Ddiwan aɣelnaw n yikayaden d temsizzliyin. Ama i wid i sɛeddan tikkelt tamezwarut i d-yellan gar 11 alamma 15 seg yunyu iɛeddan, ama i wid i sɛeddan deg tegnit-agi tuzzigt ara i d-yellan seg wass n lexmis iɛeddan 13 alamma d ass-nni n lrebɛa 19 yulyu 2017.
Ghani Amazigh