Deg tkerḍa tamaynut i d-thegga tesdawit Mulud Mɛemmri n Tizi Uzzu i yinelmaden ijdiden, tettwakkes tira n tmaziɣt, ur d-yeddi ara diɣ, yisem n tesdawit Mulud Mɛemmri, ayen i d-yessekren lɣiḍ ameqqran ɣer yinelmaden n tesdawit-agi, ussan-nni n tuɣalin. Din din, yeffeɣ-d yiwen wulɣu i yettwazuzren deg Facebook, anda yeṭṭaleb aneḥbus ɣef leqraya alamma tuɣal-d tira n tmaziɣt akked yisem n Mulud Mɛemmri. Ihi, yeḍra-d uneḥbus ɣef leqraya i kra n lweqt deg tesdawit. Xas ulamma mačči akk inelmaden i d-yerran i teɣri, meɛna tigawt-a, tewwiḍ ɣer yiswi-s imi i d-tuɣal tira n tmaziɣt akked yisem n Mulud Mɛemmri ɣef tkerḍa-nni, ɣef wakken i asen-iṛeggem Pr Tessa, imḍebber amezwaru n tesdawit. Seg tama n yimḍebber-a, tamsalt tban, u lumur fran imi iwala d akken ‘’inelmaden sɛan lḥeqq, meɛna ilaq ad aɣ-d-ssiwḍen tiɣri i nekni, ad nemmeslay uqbel ad ɛeddin ɣer uneḥbus-agi. Syin ma walan, tewwi-d ad t-xedmen, ad t-xedmen’’, i d-yenna Mass Tessa. Ma d inelmaden, nutni walan tamsalt s tmuɣli-nniḍen. Deg wawal i d-wwin ass-nni n unujmuɛ sdat n temkerḍit n tesdawit Mulud Mɛemmri, walan yinelmaden d akken ‘’tukksa n tira n tmaziɣt ɣef tkerḍa tamaynut n unelmad d asenqes deg wazal n tutlayt, ama d tamaziɣt neɣ tafransist imi ula d taneggarut-a, ulac-itt deg tkerḍa-agi’’. Imi ayen ibanen, iban, ula d imḍebbren n tesdawit, fehmen timsal u steɛrefen d akken yella-d lexsas deg tira n tkerḍa-a. ‘’Tamaziɣt, d tutlayt taɣelnawt u tunṣid, ilaq ad tili deg tkerḍa-agi. Gar-aɣ d smana, ad d-ffɣent azal n 12 000 n tkerḍiwin n yinelmaden ijdiden s tlata n tutlayin : tamaziɣt, taɛrabt akked tefrensist’’, akka i asen-yenna Pr tessa, imḍebber amezwaru n tesdawit n Tizi Uzzu. I wakken ad iqenneɛ ugar inelmaden, ikemmel yenna ‘’Aql-aɣ la nettwali amek ara nerr timsirin n tmaziɣt deg wahil n yal aɣiwen’’. I usmekti, lemden deg tesdawit Mulud Mammeri ugar n 60 000 n yinelmaden, gar-asen 12 000 imanuten. Aseggas-a, rnan-d 135 n yiselmaden ɣer dinna, am wakken ulin 11 n yiselmaden ɣer uswir n Professeur. Ugur ameqqran n yinelmaden n tesdawit-a, d tamsalt n tɣellist imi aṭas n cwalat i d-yettilin, ladɣa deg Tamda akked Boukhalfa anda i d-tegla ula s tmettant n yimdanen. Aṭas n tmesbaniyin i d-yellan ilindi ɣef demma n wanect-a.
Hocine Moula