Ass-nni n larebɛa yezrin 18 deg waggur n tuber 2017 i mmden 24 n yiseggasen ɣef tmenɣiwt n uneɣmas akked umeɣnas meqqren Smail Yefsah. I ilulen ass n 29 tuber 1962 deg taddart n Tala Amara deg tɣiwant n Tizi Rached, deg lwilaya n Tizi Uzzu. Yelmed deg waṭas n yiɣerbazen n Tizi Uzzu, gar-asen; aɣerbaz n amenzu Hamouténe Ali, aɣerbaz alemmas Mouloud Feraoun, syin akkin deg tesnawit deg Lɛarc n Larbaɛa n At Yiraten, ma d almud-is asdawan, yella-d deg tesdawit n Lezzayer Tamanaɣt, anida yeɣra tussniwin n tsertit. Syin ɣer-s mi yekfa leqraya yekcem ɣer tɣamsa, deg tiliẓi n Lezzayer. Smail Yefsah, yella d aneɣmas yesɛan tabɣest akked tissas. Imi iwala belli tutlayt tayemmat n uɣref azzayri tettwaḥqar deg tiliẓi gar snat n tutlayin-agi taɛrabt akked tefransist, iɣaḍ-it lḥal aṭas imi tutlayt n lejdud tuɣal deg rrif. Yella yessaram ad d-yaweḍ anida ara teṭṭef amkan-is am tutlayin-nniḍen, dayen i d-yenna deg yiwet n tedwilt deg umaṭṭaf wis sin deg useggas n 1991, dɣa yenna-d: “Asirem-iw ameqqran ad waliɣ tidwilin deg tiliẓri n tmurt n Lezzayer s tmaziɣt, i wakken ur nettili ara d iɣriben deg tmurt-nneɣ…”. Tugdi mačči d ayla-s, ayen yellan deg wul-is yettban-d deg tigawin-is d uxeddim-is. Imi ula ma ggulen deg-s wat n yiččumer, nnan-as ad tḥebseḍ ayen txeddmeḍ, netta ur yerri ara aḍar ɣer deffir, maca d akemmel i ikemmel deg leqdic-is d timeɣnest-is ɣef teqbaylit d tmaziɣt s umata. Ass n 18 tuber 1993 deg Bab Ezzouar deg Lezzayer Tamaneɣt, i wwin tarwiḥt-is s leɣder yiɛdawen n tmussni, i t-yurǧan akken kan i d-yeffeɣ seg uxxam-is, wwten-t s ujenwi akked terṣaṣin, din i ddmen leɛmer-is. Ad nesmekti kan belli, asmi yemmut ɣur-s ala 31 n yiseggasen deg leɛmer-is, yerna akken kan i wwḍen 40 n wussan ɣer tmeɣra n zzwaǧ-is. Asmi yemmut, bih bih isali yuɣ akk tamurt n Lezzayer, yettwanɣa urgaz deg lbaṭel ur yenɣi ur yukir. Ass n temḍelt-is i d-yellan deg tmeqbart n taddart-is Tala Amara, ur ufin ara medden anida ara ddun, ussan-d seg yal tama, ttnadin akk ad t-ẓren i tikkelt taneggarut ulamma zzement wallen-is. Seg wassen ar tizi n wass-a, yal mi ara d-yezzi 18 tuber n yal aseggas, tettuɣal-as tejmilt deg taddart-is, i wakken ur tettun ara irgazen yecban wigi.
G. A.