Armi d timlilit taneggarut, tis 15, i terbeḥ tarbaɛt n JSK deg unnar-is, annar n umenzu n unbir n Tizi Uzzu.
Deg tizi uzzu, temɛadal JSK 6 n tikkal u texser yiwet n temlilit. Ulac s wacu ur wwiten ara i wakken ad tbeddel fell-asen, ulac amek ur yexdim uselway-is Hannachi i wakken ad terbeḥ meqqar meqqar yiwet n temlilit deg unnar-agi : yestaxer asleɣmay Mouassa d kra n yimyuraren, yewwi-d raqi seg Skikda, meɛna mebla lfayda. Teqqim tarbaɛt n JSK gar tneggura n tneggura. Aṭas i d-yewwin awal ɣef yimyuraren ur nleɛɛeb ara deg wulawen-nsen ‘’Imyuraren-agi, bɣan kan tadrimt, ur cliggen ara deg JSK, ama texser, ama terbeḥ. Rnan ttnaɣen gar-asen’’. I d-yenna Ramdane, yiwen n yimferreǧ n tarbaɛt-agi. Ma d wayeḍ iwala d akken ‘’Ur leɛben ara ɣef nnif yimyuraren n JSK, ulac deg-sen Leqbayel. Anda-kem a JSK n zik !’’. i yessḥassef Djamel. Amur ameqqran deg yimferǧen akked yimyuraren-nni n zik n JSK, sseḍlamen yal tikkelt aselway-s u ṭṭalaban rwaḥ-s, acu kan Hannachi, ireṣṣa, u yal mi ara texser JSK, yettawi-d ssebba tajdidt : ma mačči d anefray d imḍebber amezwaru n ddabex uḍar Raouraoua, neɣ dayen-nniḍen. Lḥasun, seg tazwaru n telɣuɣa ar tura, d cwal deg uxxam n JSK. Wa, yesmendag times, wayeḍ yessensay-itt, ma d amur ameqqran ttfarriǧen deg-s, ur d-nnin hemma, am wakken yeɛǧeb-asen lḥal deg-i i tella JSK neɣ ten-teɛni ara temsalt. Cwi kan llan kra n yimferǧen i yesɛan nnif deg wulawen-nsen, u yekcem-iten lḥir ɣef JSK, kkren-d, ssawlen i yimferǧen i wakken ad ruḥen s waṭas ɣer unnar n umenzu n unbir, ad ilin ɣer tama n terbaɛt-nsen. Aya, yella-d ass-nni n ssebt mi turar tarbwt n JSK akked tarbaɛt n CRB deg unnar n umenzu n unbir n Tizi Uzzu. Tiɣri n yimferǧen akked tisin-nsen s waṭas ɣer unnar n JSK, yegla-d s yiswi-s imi terbeḥ tarbaɛt-nsen yiwen ɣer ulac sdat n tarbaɛt n CRB. Akka, yuɣal-d ciṭ n usirem ɣer wulawen n wid iḥemmlen JSK. Tarbaɛt-agi i yellan gar tneggura deg yigimmaḍ u tezmert ad tṣub ɣer uswir addayan. Acu kan, akken i d-yenna Ali Bencheikh, yiwen n umyurar n zik ‘’JSK, muḥal ad tṣubb’’. Ihi, akken i as-yenna Zedek, diɣen : ‘’Yid-m ass-a d-uzekka, nekni dayem akka, ma d urar i aɣ-d-yettawin. Ma trebḥeɣ nttekka, ma txesreḍ d JSK, acḥal i yecbeḥ yisem-im’’.
Hocine Moula