D asaru ‘’Amennuɣ n wul’’ i yewwin arraz Tazemmurt n uwreɣ n usaru ameqqran n tfaska tadelsant taɣelnawt n usaru amaziɣ i d-yeḍran deg Tizi Uzzu, seg 17 ar 22 deg duǧember iɛeddan. D isebgaren n usaru-a, daɣen, i yewwin Tazemmurt n uwreɣ n usebgar d tsebgart igerrzen : wigi d Salim Miloudi i yuraren s yisem Wassim akked Fahima Djayette (Sarah). Yeḥka-d usaru-agi taqsiṭ n Sarah yettɛicin gar baba-s asekkran akked gma-s bu lehyuf. Tessaweḍ armi truḥ ad tenɣ iman-is. Acu kan yesslek-itt-id Wassim. Ruḥ a zman, rwaḥ a zman armi mmlalen deg tesdawit, myeḥmalen dayen kan. Bɣan ad myezwaǧen, meɛna ugin yimawlan n Sarah. I wakken ad awḍen lebɣi-nsen, rewlen akken. Ayen i ten-yeǧǧan ad idiren deg twaɣit tameqqrant u ad ndemmen ɣef wayen xedmen imi i d-rran s lexbar s uceqqiq yellan gar tsuta taqdimt akked tetrart. Ɣas akken, ad yekfu usaru s zwaǧ n Sarah d Wassim, yerna s lebɣi n snat n twaculin. Ma d Tazemmurt n uwreɣ n usaru ameẓyan, tṣuḥ-d asaru ‘’Ɛuhdeɣ-kem’’ n Mohamed Yargi. Asaru-a, d asmekti n wassaɣen yellan gar Allili d uletma-s Baya. Tazemmurt n uwreɣ n ufetray (documentaire), yewwi-t Mustapha Boukertas s uftray-is ‘’Itran n Lmulud’’. Afetray, yemmal-d asfugel n tmeɣra n Lmulud deg tmurt n yimzabiyen. Yesban-d amek ṭṭfen Wat Mẓab deg tsirit akked wansay n tmeɣra-a i ikecmen deg yidles amziɣ s umata. Ma d tazemmurt n uwreɣ n usaru asider (film d’animation), yewwi-t ’’I neẓra mazal ad nẓer’’ n umseḍru Karim Belabed. Iḥekku-d usaru-a ɣef snat n temsal. Tamezwarut, d ass aɣezfan d waggur n Remḍan d wamek i t-sɛeddayen Leqbayel s umata. Tis snat, tḥekku-d ɣef tmetti gar zik d tura, am lebsa n tmeṭṭut akked leɛwayed n lejdud. Arraz aneggaru, Tazemmurt n uwreɣ n tira n sinaryu, tewwi-t Djamila Boualem s uḍris ‘’Lǧerḥ ur nḥellu’’. Ma ɣef wamek i d-yeḍra uktazal n yisura akked yiḥulfan n wid yewwin arrazen, ha-t-an wacu i d-nnan :
Omar Fetmouche, aɛeggal n tesqamut n uktazal
i wwaken nefren-d asaru ;nesseqdec ilugan ilaqen i wakken ur nesseqas ara deg wazal n Tzemmurt n uwreɣ. Deg tazwara, niqal nugal ur d-yettili ara warraz Tazemmurt n uwreɣ imi isura imezwura i nwala, ur yewwiḍ ara uswir-nsen ɣer warraz-a. Acu kan, deg taggara, mi nwala asaru ‘’Amennuɣ n wul’’ n Mohamed Rahal, tuɣalaɣ-d tarwiḥt imi asaru-a, dayen ifazen. Bɣiɣ kan ad d-iniɣ d akken ilaq win ara ixedmen asaru ilaq-as ad yessin amek teddun lecɣal, ilaq ad yexdem tannant.
Hacène Halouane, aselway n tesqamut n tira n yiḍrisen n sinaryu
llan yiḍrisen, yelhan, llan wid ixussen, acu kan llan kra, ulac maḍi. Deg ufran-nneɣ, nwala ɣer tlata n temsal. Tamezwaru, d tira iwulmen, tis snat d asnulfu n tiktiwin, tis tlata d talɣa akked yilugan n tira n yisura acku llant kra n tektiwin, lhant, acu kan dir-tt tira-nsent. Ur d-iban ara d acu yebɣa ad yaru bab-is.
Mohamed Rahal, amseḍru n usaru ‘’Amennuɣ n wul’’ i yewwin Tazemmurt n uwreɣ
Freḥeɣ aṭas imi asaru-agi-inu, yewwi tlata n warrazen. Dayen ara yi-yefken afud ad kemmleɣ ɣer sdat. Tanemmirt i tesqamut n uktazal imi i yi-tesnemmer deg taggara.
Hocine Moula