Ussan n umezgun wis 9 ara d-yilin d tajmilt i Muḥend u Yeḥya deg tezrigt tis rrebɛa n warraz n Muḥya i wureɣ n uḍris n umezgun ifazzen s tmaziɣt, ad d-ilin aseggas-agi ass n larebɛa 6 deg waggur n duğamber 2017, akked uzekka-yin n lexmis. Ad d-tili timsizzelt-agi deg tezrigt-is tis ukkuẓ n tmezgunt Muḥya n wureɣ i yuran s tmaziɣt, deg uxxam n umezgun amniḍan Kateb Yasin n lwilaya n Tizi Uzzu. I wid yebɣan ad ttekkin deg temsizwert-a, mazal-asen ddurt-agi sdat-nneɣ i ujerred deg wunuɣ n uttekki. Imi ass n letnayen-agi sdat-nneɣ 20 deg waggur n unbir i ttiɛad aneggaru n ujerred, ihi ilaq ad sersen iḍrisen-nsen n umezgun send 20 deg waggur-agi ideg nella. Ttunefken-asen tlata n yimukan i usersi n tmezgunin-nsen, ad xtiren gar: Tenmehla n yidles d Uxxam n yidles Mulud At Mεemmer neɣ deg Uxxam n umezgnu amniḍan Kateb Yasin n lwilaya n Tizi Uzzu, yellan tama n Usqamu aɣerfan aɣiwan (APC) n Tizi Uzzu. Ad d-bannen yigemmaḍ ineggura n temsizwert-a, yerna ad d- tili tukci n warrazen i tlata n yiḍrisen ara d-yufraren deg temsizzelt-agi, ad tili ass n lexmis 7 deg buğamber 2017, deg Uxxam n umezgnu amniḍan Kateb Yasin n lwilaya n Tizi Uzzu. Ad d-nesmekti kan belli deg tezrigt-agi tis tlala n warraz n Mouhia n wuraɣ i uḍris n umezgun i iffazen, ilaq ad yili yura s tmaziɣt. Ma dayen yeεnan arrazen ad ilin kraḍ, i tlata n yiḍrisen ara d-yufraren. Yella win n wuraɣ s wazal n 150.000.00 DA, ma d wis sin n lfeṭṭa s wazal n 100.0000.00 DA, ma d wis tlata d win n udrenz (Bronze) s wazal n 50.000.00 DA. Ad d-nsmekti idisan idelsnen i d-iheggan leqdic-agi, gar-asen: Tanmehla n yidles n Tizi Uzzu, akked Usqamu Aɣerfan n Lwilaya ( A.P.W) n Tizi Uzzu, s tallelt n Uxxam n yidles Mulud At Mεemmer n Tizi Uzzu, s lemεawna n Uxxam n umezgun amniḍan Kateb Yasin. Ma d tura ad d-nuɣal ɣer tmeddurt d yimuhal n urgaz-agi ameqqran. Ilul Mass Muḥend u Yeḥya s yisem-is neṣṣaḥ Abeddlah Muḥya, deg wass amenzu n waggur-agi n unbir deg useggas n 1950 deg Yiεezzugen, yemmut deg tmaneɣt Paris deg tmurt n Fransa, ass n 7 deg waggur n duǧamber 2004. Yettuneḥsab d ababat neɣ d tigejdit n umezgun s teqbaylit, am wakken daɣen i yeqdec aṭas deg tmedyazt. Am wakken daɣen i ixdem tasuqqilt d tserwest i waṭas n tceqqucin seg tutlayin-nniḍen, gar-asen-t: “Am win yettraǧun Ṛebbi” (En attendant Godot) n Samuel Beckett, “Aneggaru ad d-yerr tawwurt” (La Decision) akked “Llem-ik, ddu d uḍar-ik” (Exception et la règle) n Berthold Brecht, (La jarred) neɣ “Tacbaylit” swayes yettwasen aṭas…atg.
Adaoun Abdel Ghani