Ssebt-agi deffir-nneɣ, 20 deg waggur-a n yennayer ideg nella, ɣef 14h00 n tmeddit, tella-d temlilit taseklant s tewsit n “Café Littéraire” deg Wammas adelsan Ferḥat Remḍan n Buzgan deg lwilaya n Tizi Uzzu. D timlilit ideg yezzi wawal ɣef usentel-agi : turart s waṭas n wuraren deg tansa n Internet neɣ s tefransist “Dépendance aux jeux en ligne et a l’Internet”. Yewwi-d awal Mass Meḥmud Budaran awal ɣef lemḍarat swayes i d-tgellu turart n waṭas n wuraren deg Internet, ama ɣef tezmert n ugrud, ama ɣef unegmu-ines…atg. Am wakken daɣen i d-yemmeslay umaru d uduktur deg tussna n “biomedicales” deg udlis-is “La violence sociale en Algérie”, i d-yessazreg deg yiseggasen yezrin, ad yili diɣ usenzi s ubuddu-ines i wid yebɣan ad t-aɣen. Ad d-nesmekti imeɣriyen-nneɣ, belli d tagi i d timlilit taseklant tis snat deg useggas-agi amaynut n 2018, nessaram ad idum leqdic n tiddukkla-a i lebda.
G. A.