Segmi kan yeɣli uselway n tigduda deg waṭṭan i t-yesbeɛden seg leqdic nnig n tlata n wagguren-aya, yekker uhetwir deg yikabaren n tsertit. Yal wa yettnadi ad d-yaf tasuret i s ara yekcem ɣer Lmuradia. Meɛna akken i as-yenna Lunis : « Ttnadin ɣef tsarut, tabburt urɛad i tt-ufin. » Ar tura kka, sɛan azref wigi yettazzalen, ḍemɛen tafsut taɛrabt ad d-telli tibbura-s i MSP neɣ NAHDA, ahat ad d-cbun atmaten-nsen di Maser’ɣas akka tura terwi), neɣ wid n Tunes(atta-n liḥala trekkem). Meɛna, aɣbel ameqran deg waya d akabar-nni i d-ibedden deg wudem n At Yičumar i d-yeggran ass-a yettnejmaɛ yid-sen ! Aniwa ur necfi ara i wawalen-nni yettakken abeḥri i turet n uselway n ukabar-a mi d-yenna : « leḥkem n at yičumar-a am lmut, ǧǧerriben-tt medden yiwen n wass. » Neɣ ahat, asmi akken ara yeḥbes umecwar n tefranin n 1991, mi d-yenna : « S kra n win yeẓran belli azekka-ines d win n tarwa-s ata-h di Lezzayer ad yexdem kra iwakken ur yettkemmil ara umecwar-a n tefranin. » Yeɛni, di tallit-nni d akabar n FIS i d-iḥellan tuget n leswat. Amek ihi ass-a, yeqqel yettemcawar netta d Makri akked Fathi n Nahda ɣef lebni n Lezzayer n uzekka ? D ayen ara yesneqlaben deg uẓekka Rachid Tigziri ad t-yerḥem Rebbi, Djaâfer Ouahioun yeɣlin s terṣaṣin n At yičumar iwakken ass-a wid i d-ǧǧan deffir-sen ad mceččen tagla d lemleḥ ! Cwiṭ n swab maḍi maḍi, waqila mazal ur yekfi ara wawal ɣef terbaɛt n Saint Egidio, mi akken si L’husin yemlal d wid yecban wigi n wass-a, yeɣli-d webruri n ticmat fell-as. « Tacacit n ddel, leɛqud n ticmat… » ttuzzuren deg yiɣmisen d temliliyin, am wakken Ait Ahmed yerra Lezzayer d Kaboul. Meqqar netta, yessaweḍ yesnejmeɛ Anouar Heddam, Rabah Kebir d Djabellah daxel n…l’église ! Wamma akabar-a ideg neḍmeɛ lxir yezder s axxam i d-yeǧǧa Nahnah d wid akked i tt-icudd di Zberber ! Amek ass-a ur nettaweḍ ara ad d-nini belli rray yecban wa yerra di rrif ayen akken iɣef i d-yebded ukabar n Mohcine Belabbes. Seg tama, MSP d Nahda iban ubrid-nsen, seg tayeḍ d Ahmed Benbitour i d-yennan ɛinani : « Ur yezmir ad d-yili usenṣeb n tmaziɣt mebla tifranin anda ara nciwer agdud. » Wissen dɣa ma yeqqim-d umeslay d yimdanen yecban wi i yebɣan ad rren ula d laṣel-nneɣ s cwer ! Amdan-a, ur yekkuker ara mi d-yenna di Berbère TV belli ilaq i leqbayel ad sfehmen i wid nniḍen d acu i bɣan, d acu n tmaziɣt i ilaqen ? d agejdur ! Yak Lwennas yeǧǧa-d awal ideg i d-yenna : « Urɛad i tt-ṭṭifen neḥraret, ma ṭṭfen-tt ad tenger, tekfa. » Meqqar lukan ur d-yelli ara wawal iḍelli ɣef si L’Hocine ulac uɣilif ma yeḍra-d zwaǧ n wass-a, meɛna a wi yekkaten ala deg yirden d temẓin !
S. M