Qqaren At zik : ur kkat a gma, ineṭṭeḍ, neɣ ahat : A wi yekkaten ala deg yirden d temẓin. Yal wa amek i yezmer ad yegzi inzi-agi neɣ amek ara t-yesseqdac di tudert-is n yal ass.
Nlemd-d seg yimezwura d akken mi ara tewteḍ deg yiwen ama d aɛiban neɣ d amuḍin, ḥṣu belli aḍu-nni ur k-yettazgal ara. Daɣ, ma tcuhaḍ ( tenniḍ ccah) deg wayen yedder yiwen, ahat ad d-yass wass ideg ara tqableḍ taswiɛt yecban tinna. Ass-a, aql-aɣ deg-s, imi win akken yendin tifextin di kra n yiseggasen yezrin, ass-a tewweḍ-d s aqerruy-is. Amek ihi, aniwa ur necfi ara ɣef Belkhadem mi akken yeṭṭef taɛekkazt n uḥeǧǧaǧ, yuɣ akk tamurt iwakken ad yemḍel Benflis d amuddir ? Imi, afus-is ɣezzif, ddan yid-s imeɣnasen n FLN, wa s lxuf, wa s ṭṭmeɛ. Yessa-tt, akken qqaren di tfernin. Yeḥkem, yesserwet akken i yebɣa, tikwal alamma tcukkeḍ belli mačči yiwen i yellan seg-s. Ata-n di yal tama, si tselwit n tigduda, alamma d lqasmat, ur yeggan, ur yesgan. Maca, i tebɣuḍ tiɣzifeḍ ay iḍ, d ulaqrar ad yali wass. Lɣulat akk yendi i uxṣim-is Benflis, yessekfel-itent-id Kara d Khaldi. Yal ass ara iɛeddin, ineggura-agi sseǧhaden tama-nsen. Tewweḍ tfidi s iɣes n Belkhadem ! Yeɛweq anda ara tent-iger, tama iɣer yezzi, ad n-yaf ndint.
Limer ad nezzi cwiṭ ɣer deffir, ad naf deg ukabar-a tuɣal d lɛada. Si Mehri alamma d Belkhadem, tamsalt-a n usenqer mačči tura i d-tlul. Bɣan yakan ad aɣ-kelxen belli d tugdut, maca, mačči d zik-nni.
Leḥkem, s kra n win yedlan fell-as ur as-iberru ara. Akka i tella ama ɣur-neɣ neɣ ahat di Tefriqt s lekmal. Wigi, ma ifat ɛerḍen tacriḥt n tsekkurt, ur zmiren ad qenɛen. D acu kan, s kra n win yendin tiqillaɛin iwakken ad yali s akersi, ad d-yaweḍ wass anda ara sendin wiyaḍ. Ula d wigi yezzin ɣef uqerruy n Belkhadem, ad d-taweḍ nnuba-nsen.
Sylia. M