Abrid aɣelnaw uṭṭun 09, i yellan gar Bgayet d Ṣṭif, yella deg-s lexsas d ameqqran. Ama seg tama n uxeddim-is, imi yeččuṛ d imedwab, d yiceqqiqen, ama seg tin n tafat i iɣaben meḥsub deg-s. Amedya d abrid yellan gar Bgayet d Tici. Neɣ ma tella ur tleḥḥu ara. Rnu ɣer waya, llan yimukan deg-s d amahi ameqqṛan ɣef yinehhaṛen. Amedya d aɣayan (virage) i yellan deg temnaḍt iwumu qqaren At Ɛnan, i yettabaεen i tɣiwant n Yiderginen. Aɣayan-a, idewwer mliḥ, ula d tafat ur yesεi ara. Mebla ma nettu belli, d abrid i iḥezzqen mliḥ, armi ur zmirent ad mlilent deg-s snat n tkeṛyas. Ayen yessuhamen ugar, amek i ttɛeddayen syin-a yikamyunen imeqqṛanen ? Acku amkan-nni, yettwassen s umahi-s, ṣṣawden dɣa kra n yinehhaṛen, semman-as “ṭṭuṛna n lmut”.
I yissali, deqs n yisehwa i d-yeḍṛan deg wadeg-nni. Ḍran-d yineggura ass n 04 akked 07 fuṛar yezrin. Deg-sen dɣa llan aṭas n yimejṛaḥ. Ad d-nesmekti d akken, abrid-a i yellan gar tɣiwant n tsexriwt d win n Ssuq Letnin i yettεeddayen seg win n Yiderginen, segmi yettwaxdem deg useggas n 1879, ar ass-a ulac d acu i ibeddlen deg-s. Γef usentel-a yenna-aɣ-d yiwen n yilemẓi seg tɣiwant n Yiderginen : “mačči d tikkelt mačči d snat i d-nehder ɣef uɣbel-a, isehwa deg ubrid-a ur ḥebbsen ara, ladɣa deg unebdu. Tecfam ahat ɣef wayen i yeḍṛan i umḍiq n uẓebbuc ilindi, imi i yegrareb. Ayagi mi ṭṭuqten wid yettεeddayen syin-a. Lameεna imasayen ur d-ggaren ara tamawt i waya, ḥacama tewweḍ tiyita ɣer yiɣes. Ihi ad d-nεiwed tiɣri i yimasayen i wakken ad xedmen abrid-a, ad t-swessεen, uqbel ad ifat lḥal ».
K. K.