Imdanen ur neqbil rrebarb i ten-izenzen

Ulac aɣmis ur d-newwi awal, ussan-a ineggura, ɣef tmenɣiwt n 3 yirebraben deg temnaḍt n Ticci deg twilayt n Bgayet. Meɛna, akk-nsen nnan-d kan lɛesker i ten-yenɣan. Amek i teḍra tmenɣiwt-a ? Amer mačči d imdanen i ten-izenzen ɣer yijadarmiyen, ahat mazal seqcaren deg ddellaɛ seblaɛen deg yigran n tmurt n Leqbayel.

Γer luǧuh n 3 ssbeḥ n wass larebɛa, lɛesker nɣan-d tlata n yirebraben, deg taddart Mehwi, taɣiwant n Ticci.

Azal n tlata n ssmanat segmi lɛesker ssan deg temnaḍt-a iwumi sawalen At Ɛemrus, i d-iḥuzan cwiṭ seg tɣiwant n Buxlifa d tɣiwant Ticci. Sbedden aqiḍun deg teɣremt La Comtesse. Lexber yewweḍ-iten-d belli irebraben delwiḥen deg leǧwayeh-a. Amek i d-wwin lexber ? D. Ɛ. J. argaz-a ɣur-s tibḥirt n ddellaɛ. Tikwal yettwali tibḥirt-ines tettwarke&#7693,; terwet. Icukk d ilfan, ladɣa, deg yiḍ yeddari deg yiwet n tqernit yettraǧu. Ata jban-d. Ziɣen mačči d ilfan, d irebraben. Yeqqim din armi ruḥen, yerwel, armi d azekka-nni isubb-d ɣer yiǧadarmiyen, yemla-asen ayen iwala.

Dindin, lexber yewweḍ lɛesker, i yebdan leqdic armi d ass n larebɛa ddmen rray ad wwten. Sbedden-asen-d yiwet txazibut ideg d-ɣlin.

Ad twalem irebraben-a d wid i d-irewlen seg lḥers i iḥersen fell-asen lɛesker, ɣer yidurar Akfadu, d umadaɣ Adekkar d Ǧebla.

« Rrsas yebda ɣer luǧuh n 9 yiḍ n larebɛa armi d tlata ɣir-rrbeɛ n tsebḥit, i teṭṭerḍeq tersast taneggarut n lɛesker. » i ɣ-d-yenna B. H. yiwen n umezdaɣ n taddart Taguba, yezgan udem ɣer wudem d taddart Mehwi, iruḥen ad texlu.

Mi d-tefrari tafat, ɣer luǧuh n 7, lǧettat n 3 yirebraben-a, yettwadlan armi d aqerru, ttwafesrent deg ubrid. Mi d-wwḍent lambilans n yisensayen d tin n sbiṭar, glan s lmeytin-a ɣer sbiṭar Xlil Ɛemran, yellan di Bgayet. Ma d aɛsekri yettwajerḥen yewweḍ leɛfu Rebbi deg ubrid, zdaxel n lambilans.

M. I.