Ass n larebɛa yezrin, aselway n tigduda, Abdelaziz Bouteflika yessemlal-d ineɣlafen i merra deg uxxam n tselwayt i wakken ad tt-yegzem deg rray deg kra n temsal yerzan tadrimt d tmaziɣt. tamezwarut, aselway n tegduda, yebɣa ad isers ɣef lsas iseḥḥan tamsalt n tedrimt anda ara yili yiwen n wassaɣ iǧehden gar useqqamu n yiɣlifen d win n uɣerfan aɣelnaw. Ma d tamsalt n tmaziɣt, iwulem ad d-nini belli iɣilifen d yimecriwen ttwakksen imi Bouteflika, igzem-itt deg rray i uɛiwed n usaḍuf n 1963 i d-ibeggnen lejrida n leɛyudat. Dɣa dagi i d-yella umwata ɣef uɛiwed n tmuɣli n lejrida-a anda ara yettureṣṣi yennayer gar leɛyudat tiɣelnawin. D rray ara yerren tilisa i leckuk izedɣen imdanen imi, iwulem daɣ ad t-id-nesmekti, deg waggur n yennayer yezrin, mi akken i yuɣal umenzu n yennayer d tameɣra i yizzayriyen merra, yuzzel wawal d akken imi d-yusa kan d ass n lǧemɛa i d-yella waya. Ahat, s ubeddel n lejrida-a, ad kfun yir imeslayen, d lawan ad nqabel aya s lferḥ. Tis snat, d tamsalt n tkadimit i d-yuɣalen deg useqqamu-a n yineɣlafen, anda aselway n tigduda yessuter d akken ad d-yili uheyyi s lɛejlan n usaḍuf ara yesseddun taseqqamut-a. Wigi, mebla ccekk, d igumma i d-yesseɣres ugdud s umata, d yimeɣnasen beddemma ur neɣfil ɣef lasel d tjaddit. D lawan i wakken ad yettwakkes zzerb i tmaziɣt yettezzin kan gar warraw-is, nnig n lkanun. Asaḍuf-a, ad yessemɣi afriwen i tutlayt ɛzizen ɣef Mɛemmri, ad taɣ timnaḍin n Lezzayer i merra. Ulamma ass-a, 38 n twilayin ideg tella, maca ur tḥuz ara inelmaden imerra, imi llant twilayin ideg yella yiwen n uselmad. Tura akka, s uzday n lqedd ara taweḍ, mi akken ara d-yernu lqanun n uselmed-is am nettat am tangayin-nniḍen, mačči i win i tt-yebɣan kan. Akka i yella deg wawal, win iteddun ɣef tidet yessawaḍ, d ta i d liḥala n tmaziɣt, imi d tanaslit, yewweḍ-d wass ideg i as-d-yuɣal wazal-is.
M. Smail