Yebda yettbin-d ufiqi n yilemẓiyen n tmurt s wazal d ubaɣur n umussu asdukklan deg tmetti n tura d tudert tatrart n yal ass. Ussan-a kan i d-tennulfa s wudem unsib tddukkla tajdidt deg taddart n Seɛdan, i yeṭṭafaren taɣiwant n YiderginenA. Send ayendin d taxessast deg yiḥricen n tneflit yemgaraden, ladɣa win n yidles, nwan yilemẓiyen i d-yessekren tiddukkla-a, ad beddlen udem i temnaḍt-nsen deg wakuden izerben. Awi-d ukan ad tili d turmidt, ad d-binen yiqeddicen-is deg unnar. Dɣa, nezmer ad nɣer deg wulɣu n teywalt i d-suffɣen beddemma: « Nekni s yiɛeggalen i d-yesbedden tiddukkla, s tadfi ara d-nberreḥ s unulfu n tddukkla tadelsant s yisem n “Tilelli n Seɛdan“. Negzem-itt di rray ad d-nettak akk ayen iwumu nezmer i usnerni n yidles d umbaddel d umussu asdukklan, aseḥbiber ɣef tmagit tazwawt n tmetti-nneɣ, d uxdam amek ad ttwaḥerzen wansayen d leɛwayed i aɣ-d-ǧǧan yimezwura-nneɣ, d ufares-nsen deg wayen yelhan i ubaɣur amatu n yiɣermanen-nneɣ ». Ad d-nesmekti d akken, i lmend n beddu dɣa, teldi yakan tddukkla tiwwura-s i win yebɣan ad yekcem i terbaɛt d ameltaɣ (adhérent), abeɛda seg temnaḍt-nni n Seɛdan. Si tama-s, yessawal uselway n tddukkla-a tamaynut, Mass Saym Abdelkrim, i yakk ilemẓiyen-nsen ad d-kecmen s ṭṭaqa ɣur-sen. Ula d aberriḥ (slogan) i sqedcen yiɛeggalen deg yisurifen-nsen imezwura d: « Weḥd-neɣ ad nruḥ s tazzla, lwaḥid ad nruḥ bɛid ». S unamek-is yesbeyyin-d i win yebɣan ad yegzu, amek bnan yilemẓiyen n Seɛdan asurif-nsen amezwaru. Tezga-d taddart n Seɛdan deg tɣiwant n Yiderginen, i yeggugen s wazal n 45 n yikilumiṭren ɣer Unzul-asamar n waɣir n Bgayet. Am waṭas n temnaḍin n twilayt, yezmer s teshel ad iger yiwen tamawt amek yettimɣur deg-s umḍan n tddukkliwin, yal yiwet s taɣult i teḍfer.
M. K.