Deg wussan-agi iɛeddan, i d-banen yigemmaḍ n temsizzelt n usenfar asdukklan yufraren deg tezrigt-is tamezwarut (2017-2018), i d-thegga Tenmehla n yidles n lwilaya n Tizi Uzzu. Iswan n temsizzelt-agi tadelsant d asebɣes i leqdic adelsan n umussu asdukklan n lwilaya akked usenɛet n yimuhal ifazzen i xeddment tddukkliwin ɣef teɣzi n useggas apidakuji, ɣef wakken i d-nnan. Tasqamut n leqdicat idelsanen d wid n tẓuri, ferqen tlata n warrazen i tlata n tddukkliwin i d-yufranen deg temsizzelt-agi. Arraz amenzu, tewwi-t tddukkla tadelsant “Idles d Yiles”, i ixedmen yiwen n usaru afetray (film documentaire). I d-yewwin awal deg usaru-agi; “Ma vie à travers le chant lyrique” ɣef tmedyazt taqbaylit taqburt. Arraz-agi amenzu i tewwi tddukkla-agi, yesqam-d s 800.000,00 DA. Ma d arraz wis sin i d-isqamen s 600.000,00 DA, tḥella-t-id tddukkla “Office du tourisme Akfadou”, s usenfar-nni texdem ɣef tgemmi n tmurt n Leqbayel. D tiddukkla timettit n tlawin “Tafat n Tewrirt” iwumi yettunefk warraz wis tlata s wazal n 400.000,00 DA. Ma d asentel n usenfar s wayes tewwi arraz-agi, yella-d ɣef “Lḥenni d yizlan-is”, anida i d-ḥawcen aṭas n tɣawsiwin, yecban tamedyazt s ṣṣenf n tbuɣarin akked usenzi n lḥenni, tamedyazt tadeyyanit…atg.
A. A