Mbeɛd mi asen-yettunefk wakud i uheggi n yiman-nsen, yelḥeq-d dayen i wid teɛna temsalt lawan n usɛeddi n ukayad n temsizelt n usexdem n yiselmaden deg yiɣerbazen imenza. Azekka ihi, 12 deg wayyur-a n yunyu, ad lfun waṭas n yilemẓiyen d tlemẓiyin idigan yemgaraden i wakken ad sɛeddin akayad-a n yiwen n wass. Ladɣa imi, am teɛwaydit, ad yemmag ɣef tlata n tutlayin. Yal yiwen seg yiselmaden-nni n uzekka, ad iruḥ ad yexdem ayen iwumi yezmer, ad yeɛreḍ daɣen s uqerruy-is ad yeg i yisem-is amkan deg wumuɣ n wid ara yesseɣren deg useggas aɣurbiz i d-iteddun 2018-2019. Ma nemmeslay-d ɣef tmaziɣt, ad d-nini lḥal ur iɛawen ara wid ara yesɛeddin akayad-is deg temsizelt-a n yiselmaden n yiɣerbazen imenza. Gar ssebbat n waya, ad d-nebder amḍan n yimeḍqan n uxeddim i d-tberreḥ, ussan yezrin, tenmehla n usegmi, neɣ n yiselmaden ara srebḥen seg twilayin yemxalafen. Imi ad naf deg wulɣu i d-yersen, ad ttunefken drus maḍi n yimukan n ccɣel, ladɣa deg tid anda gten widak yekkin deg temsizelt. Amedya deg Bgayet, fkan-d 10 n yimukan, deg Tizi Uzzu 6, deg Tubiret sin. D isalli amezwaru i yuɣalen i yiselmaden n uzekka d ugur, imi taseddart n zzher n rrbeḥ-nsen, iban ur tettili d tameqqrant. Nnig wugur-a n yidigan n useqdec, ula d tawtilt i d-tefka tenmehla n usegmi, mi d-nnan ilaq win yekkin deg temsizelt ad yesɛeddi akayad-ines di twilayt anda yezdeɣ, ur tehwi i yiselmaden. Skud aseggas-a kan i d-ilul usaḍuf-a amaynut, ur umren yis-s imi deg yiseggasen yezrin aṭas i yesmenyifen asɛeddi di temnaḍin-nniḍen n tmurt. Ttwalin ttawil-nni d abrid n tifrat d tafat. « Nekk lliɣ friɣ-tt d yiman-iw, nwiɣ ad sɛeddiɣ akayad-iw n uselmed n tmaziɣt di Bgayet. Maca tura ur zmireɣ ara imi d-fkan tawtilt-nni. Ttuḥettmeɣ ad t-sɛeddiɣ ɣur-neɣ ». I d-tenna yiwet seg Tizi Uzzu send ad d-tkemmel: « nnig waya, yal yiwen anda ara yesεeddi, yerna deg yimukan ibeεden. Seg tnezzayt armi d tameddit. Bezzaf! ».
K.K.