Ass-nni n lexmis 26 yulyu 2018, i tebda s wudem unṣib, tezrigt tis mrawet d semmuset (15) n lfeṭṭa n At Yanni, ara yeddun ɣef teɣzi n ddurt. Ad tfak ass n lǧemɛa 03 ɣuct 2018.
Azal n 120 n yiḥeddaden n lefṭṭa i d-yerran i teɣri n tɣiwant d teseqqamut n tmeɣriwin n tɣiwant n At Yanni, i d-isuddusen yal aseggas tameɣra-agi. 80 deg yinḍan-a, n wwin lfeṭṭa n Ath Yenni, ma 40 wiyaḍ, wwin-d isufrar-nniḍen n tamiwin-nsen. Llan daɣen yiḥeddaden i d-yewwin lfeṭṭa n tamiwin-nnḍen n tmurt n Leqbayel. Maca iswi-nsen d yiwen, ad siknen i medden di tmeɣra-agi, ayen heggan ɣef teɣzi n useggas. Tazrigt n useggas-agi, tettili-d deg sin n yimukan-agi: Aɣerbas alemmas akked Uxxam n yilmeẓyen n At Yanni. Tameɣra-agi n lfeṭṭa, d ttiɛad adelsan imi i d-yettili deg-s leqdic anesbaɣur. D armud adamsan daɣen, imi yettak tagnit i yinḍan (artisans) i wakken ad senzen sselɛa-nsen. Ma d iswi-ines, ɣef wakken i t-id-nnan yimsuddsen, d aseḥbiber d usnerni n yirmad n ufus n tmurt n leqbayel, d uselmed n yilmeẓyen i wakken ad ṭṭfen deg lḥiraft-agi ur negrent ara. Ttilin-d yisaragen yemxalafen ara d-senkaren yimussnawen d yimnadiyen deg uḥric-agi n tinḍi. Asirem ameqqran n yiḥeddaden-agi akked yimsuddsen n tmeɣra-agi, d asekcem n lfeṭṭa n At Yanni ɣer tgemmi tamaḍlant. Imi bɣan ad farṣen tagnit n tilin n tuddsa (UNESCO), di tmeɣra-a, i wakken ad ussuter-agi. D ayen i d-yenna ass-nni n lexmis uselway n tɣiwant n At Yanni Mass Deghoul Smail, deg tesfugla n tulya tunṣibt n tezrigt-agi tis 15. Tettuneḥsab tmeɣra-agi, daɣen, d tagnit i yinḍan d yimsuddsen n leqdic-agi, i wakken ad ssutren deg wid terza temsalt-a, yecban aɣlif n tmerrit akked yirmad iqburen, akken ad d-lhun s yiɣillifen i d-ttmagaren yiḥeddaden-agi. Ulamma yella lexṣaṣ deg lfeṭṭa akked yisufar imenza i sexdamen yinḍan-agi d leɣla-nsen di ssuq n berra, maca mazal ttkemmilen axeddim. Acu kan annect-agi, ur yeffiɣ ara fell-asen, imi teɣlayet lfeṭṭa ur tettnuzu ara s waṭas. Daya i yeǧǧan kra-nniḍen ad ǧǧen lḥirfa-agi i d-lemden ɣer lejdud-nsen, imi ɣef leḥsab-nsen, ur tseččay ara aɣrum deg tizi n wass-a, sdat n leɣla n temɛict. Ma ɣef tegnatin ideg ttidiren yinḍan-agi, yekfa-tent-d akk yiwen uḥeddad i nufa dinna s wawal-a: “Nenṭer mačči d izli, yerna am win iceṭṭḥen i uderɣal”. Mazal ttiɛad-agi ad ikemmel alamma d ass n lǧemɛa 03 ɣuct 2018. « Le bijou d’Ath Yenni, patrimoine national qui traverse les âges » d wagi id azwel id as yettunefken i tmeɣra n lfeṭṭa n tikkelt-a .Mi ara d tiniḍ At Yanni, ttexmam-ik ad iruḥ srid ɣer Lfeṭṭa , ɣer yiḥeddaden n temnaḍt-a. tazrigt-a tis 15 i yebdan, yakan, ass n 26 Yulyu, ad tili d tagnit anda ara d-fercen yinaẓuren axeddim-nsen, ama deg tɣawsiwin n lfeṭṭa , n lexyaḍa akkedntalaxt. S umatra , tiɣawsiwin akk yettwaxedmen s uffus. Aya-gi d ayen ara yesseḥbibren ɣef uxeddim-a , akken daɣen d tagnit n umbaddel n tektiwin d tmuɣliwin gar yinebgawen. Tafaska-agi, mačči kan d tin n usenzi, maca ula d timerrit tesɛa amkan-is deg tmeɣra-agi , imi aṭas n yiminigen n tmurt n leqbayel i d-yettasen akken ad tt-ḥeḍḍren. Ula d wid n lwilayat-nniḍen, rezzun-d i wakken ad walin ccbaḥa n yidurar, akked tin n lfeṭṭa i d-yettlalen deg yidurar. Ad ilin yisaragen ɣef teɣzi n wussan n tfaska, deg uɣerbaz alemmas Larbi Mezani akked uxxam n yilmeẓyen Keddache Ali.
G. A. / S. Y.