Par DDK | 20 Aout 2018 | 594 lecture(s)

HOURA - Tazrigt tis 5 n tfaska n ubernus

Tella-d taggara n ddurt-agi iɛeddan

Ddurt-agi, yezrin i d-tella tezrigt tis xemsa n tfaska n ubernus, i d-yettilin yal aseggas deg taddart n Houra di tɣiwant n Bouzeguène.

Asiher-a, yeddan ɣef teɣzi n tlata wussan, yebda ass-nni n lexmis 16 ɣuct yekfa sendiḍelli n ssebt 18 ɣuct 2018. Tazrigt-agi, tamaynut n useggas-a, tewwi asentel “Lhiba n uxxam”. D leqdic i d-yettwaheggan sɣur tiddukkla tadelsant n Chahid Yakoubi Ferhat s lemɛawna n teseqqamut n taddart-agi n Houra. Aseggas-agi, gan tajmilt i ucennay ameqqran n tezlit taqbaylit Idir akked uselway n terbaɛt n yilmeẓyen n Leqbayel (JSK) Chérif Mellal. Yella-d deg-s wahil d amerkanti ama s temsikniyin, ama s leqdicat idelsanen d wayen-nniḍen. Mebɛed tulya tunṣibt, i d-yellan taṣebḥit n wass-nni n lexmis 16 ɣuct 2018, tella-d telilt tamẓawant n taddart n Houra, i d-yewwin kra n ccnawi. Ma di tmeddit n wass, tella-d tikli n usenɛet s yibernyas akked tqendeyar n leqbayel. Am wakken daɣen i d-tella zzedwa n ccḍeḥ n zik akked ccnawi tiqburin. Ma d ass-nni n lǧemɛa, i d-yellan d ass wis sin n tfaska-a, llan-d deg-s yisaragen d uskasi, i d-yewwin awal ɣef wazal n ubernus di tmetti tamirant. Am wakken diɣ i d-tella deg-s turart n tmezgunt d useḥḥar i warrac, i lmend n yimuras-nsen. Ma ɣef 21h00 n yiḍ, d tarbeɛt n yiḍebbalen i isekren aɣebbar s kra n tezlatin i d-wwin. Sendiḍelli n ssebt, i d-yellan d ass aneggaru n tfaska-a, yella-d deg-s usuddes n yiwet n tazla tameẓyant s ṣṣenf n (semi-marathon) ideg uzlen ddeqs n yimdanen (imecṭaḥ, imeqqranen, tullas). Am wakken i d-tella tmeɣra n ccna, ideg fkan yimsuddsen-agi tagnit i yicennayen ilmeẓyen n tama-agi n Bouzeguène. Annect-agi akk, ɣer tama n ddeqs n temsikniyin i d-yellan ɣef teɣzi n wussan tekka tfaska-a, yecban tin n ubernus, n tqendurt, n talaɣt...atg. Ma d iswi n tfaska-agi, ɣef wakken i t-id-nnan yimsuddsen-agi, d aseḥbiber ɣef tgemmi tamaziɣt s umata d ubernus n leqbayel s wuzzig d usiweḍ-ines i tsutwin-agi i d-iteddun i wakken ad ṭṭfen deg lebsa-agi n ubernus, yettwaxdamen s taḍuṭ d wulman.
A. A.

0