Brahim Brahimi d yiwen uneɣmas muciɛen deg tɣamsa tilellit tazzayrit, yesɛa aṭas n igerdasen seg uselmed n tɣamsa deg Lezzayer, seg uselmed n tɣamsa n tmurt n Fransa. Ɣur-s sin yigerdasen iɛlayanen (doctorat) deg tussniwin n yisallen d tussniwin n tsertit, yemsennad (soutenu) deg tesdawit n Paris II. Brahim Brahimi, yesersel deg wagur n tuber 2009 Aɣerbaz aɣelnaw aɛlayen n tɣamsa d tussniwin n n yisallen (ENSJSI), anda yella d anemhal, yesselḥay armi yeffeɣ ɣer testaɣt (retraite) deg useggas n 2013. Lexber n lmut n Brahim Brahimi i d-yellan deg ssebt iɛeddan, 22 deg waggur n cutember, i yesɛan 72 n yiseggasen deg leɛmer-is, yegla-d s leḥzen meqqren deg twacult n tɣamsa tazzayrit akked ttawilat n yisallen n tmurt. Aneɣmas-a, d yiwen n umdan yettwassnen, i ḥemmlen ama d inaɣmasen i iḍallen deg leɛmer, i ixeddmen deg tɣamsa, iwumi yefka afud meqqren s tasḍilin i ixeddem ɣaf tɣamsa tazzayrit, ama d ineɣmasen ilmeẓyen ixeddmen deg tɣamsa i d-yesfaydin seg tirmitin d tsegmisent n umussnaw. Deg tudert-is, yefka-d aṭas n wafud i usnugmu n tɣamsa tilellit, anda i ittekka d waṭas n yiɣmisen n tɣamsa tusligt (privée), i as-d-yeldin isebtar-nsen i tira deg yeḥricen n tudert, ladɣa deg tussniwin n tmetti d talsa. Deg yiɣmisen ilelliyen neɣ deg ttawilat n yisallen, Brahim Brahimi, yella dima i lmendad i usnerni n tmussniwin. Dɣa deg uɣmis El Wattan, yessuddes-d aṭas n timsirin ɣer yidi-s n umussnaw Belkacem Mostefaoui d Belkacem Ahcene Djabellah, i lfayda n yineɣmasen n uɣmis-agi. Deg umahil-is n timadin, Brahim Brahim, yura aṭas n yidlisen s tutlayt n tefransist, gar-asen ‘’ Le pouvoir, la presse et les intellectuels en Algérie (1989)’’, ‘’ Le pouvoir, la presse et les droit de l’homme (1998) ‘’, ‘’ Le droit à l’information à l’épreuve du parti unique (2002)’’.
Ali Zalouk