Akken i d-yettban wudem-is amezwaru deg yifurkawen, ur yelli uzemmur n useggas-a deg tɣiwant n Ayt Smaɛel d win ara d-yefken aṭas n lɣella i ssaramen yikerrazen d wat tferkiwin. Tugna tamezwarut n tuget n tzemrin, tessken-d amek ur yeṭṭuqqet ara uzemmur di tecwawin, d wamek i yettwaɣ di kra n tamiwin. Ɣef wawal n kra n yimezdaɣ, tamentilt n waya, tcudd ɣer uddebdeb i d-yellan di tegrest iɛeddan, mi akken drus n ugeffur i d-yewwten di lawan mi ilaq ad d-yewwet. « Ur d-fkant ara tzemrin aseggas-a ɣur-neɣ, abeɛda ileqqamen, acku ur d-yeɣli uɣebbar (ageffur) deg wakud. Armi ɛeddan wayyuren akken i d-ɣlin yimiqwa, rnu mačči ɣef tikkelt. D aya i yeǧǧan tazmert n tzemrin tenqes », i d-tenna yiwet n temɣart. Tkemmel syin deg wawal-is: « Maca daɣen ula mi iɛelleq yeṭṭef ilindi, yezmer d ssebba. Acku yettili wanida tikwal ad yarew tikwal uhu ». Ulama llant kra n tzemrin i yessefraḥen, abeɛda tid n rrif rrif n ubrid, maca s umata ur urwen ara yiɛerquben n medden. Tura akka mi d-yettqarab lmaḥel n tleqqaḍt, llan yimezdaɣ i yerzan yakan i tferkiwin-nsen akken ad fersen ddeɛwa, ad heggin akk ayen ilaqen i lmend n tigawt-nni ara yebdu di kra n yimalasen. Ma d wiyaḍ, bran akk i wansay-a n ufras n yiɛerquben seg tikkelt ɣer tayeḍ, i zemren ad yili daɣen d ssebba ma ur ǧuǧǧgent ayen iwulem tzemrin. « Aṭas i neǧǧa seg leɛwayeḍ yelhan n zik, nettraǧu dima agemmuḍ kan. Zik, nezga teɣzi n useggas deg yiɛerquben, nessizdig-iten, nferres-iten, ntekkes inijel, ngezzem yir ticiṭwin. Dɣa, iteffeɣ ɣer taggara leɛtab ɣer tafat. Ma d tura, tuget n yiɣermanen, ttmektayen-d sɛan tizemrin ḥaca si lawan n tleqqaḍt ɣer wayeḍ », d awal n yiwen n urgaz seg Ayt Smaɛel.
M. K.