Ayen i iḍerrun deg yinurar n ddabex uḍar, d ayen ur iqebbel leɛqel. S imal yettɛeddi lweqt, s imal ttnernit twaɣiyin deg yinurar armi tturarent, taggara-a, temliliyin timeqqranin, anda ttilint zik d timeɣriwin n ddabex n yurar, mebla imferǧen.
Uɣalent temliliyin am win iiceṭṭḥen i uderɣal. Ma tkemmel akka, ad uɣalen ad uraren mebla imferǧen. Syin ma yella ulac anwa ara iwalin timliliyin, i wacuɣer ara leɛben? Acu kan, asteqsi i yellan akka tura deg wallaɣ n yimdanen d wa : i wacuɣer i yella waṭas n ccwal-agi deg yinurar ? Ansi i d-yuɣ aẓar ? Aya, ur d-yusi ara kan akka. llant ssebbat, llan wid i as-yefkan azuɣer, ama s lebɣi, neɣ mebla lebɣi. Ma nuɣal kan ciṭ ɣer deffir, ad naf d akken ilmeẓyen-agi yettruḥun ad ferǧenn timiliyin, amur aeqqran deg-sen lulen lweqt-nni n rrebrab. Ihi, ufan-d ccwal deg tmetti, nwan s ccwal i teddunt temsalt. Tis snat, mi ara nwali imḍebbren n trebbuyaɛ, ad ttnaɣen gar-asen neɣ akked yimḍebbren n ddabex uḍar n Lezzayer s wawalen qessiḥen u yal wa ad yesseḍlam wayeḍ, aya yesnernay lebɣeḍ d lkerh gar yimferǧen. Ulac anwa yettlumen iman-is. Ulac anwa iqebblen lexsara: ttwalin kan igemmaḍ, ur d-cligen ara deg wayen-nniḍen : la deg urar neɣ deg ttrebga. Aya, ad naf ula ɣer trubbayaɛ timecṭaḥ i yetturaren deg lwilayat, neɣ ɛad deg tudrin imi yal ddurt, yettnekkar ccwal deg yinurar, ayen i d-igellun s luǧruḥ n yimyuraren akked lemḍerra meqqran i yinurar. Deg yiwen usarag i ixedmen yimḍebbren n yiɣallen n laman deg Lezzayer tamanaɣt, nnan-d d akken afus yekka-d seg yimḍebbren n trubuyaɛ imi iɛessasen-nni ssexdament deg yinurar, amur ameqqran deg-sen sɛeddan-d lḥebs. ‘’Amek ara iṛebbi, uselmad ur netturebba’’, i as-yenna winna. Ma ɣef temsalt-nni n ccwalat i d-yellan gar MAC d CRB, nnan-d d sin n yixaddamen n unnar 5 yulyu i asen-iɛemden yimferǧen ad kecmen s llḥerraqa akked iḥerban s umata. Ugar n 1 400 n fumigènes i ṭṭfen iɣallen n laman ɣer win i ten-yesnuzun. Mačči kan daya. Deg useggas 2012, ufan iɣallen n laman 164 n tḥerraqiyin, 99 n fumigènes d wayen-nniḍen deg texxamt n umyurar n MCA, Fawzi Chaouci, deg usensu n 5 yulyu. Ma d ass-nni n lexmis iɛeddan, d Adel Bougueroua, amyurar n CRB, uɣur ufan iɣallen n laman lkif akked tqerɛetin n ccrab deg tkerrust-is. Ha-t-an iɛedda iḍelli deg craɛ. Anwa i d abrid ay abrid ma yella d imyurar i ileqmen ccwal-agi. D ccwal, diɣ, i yeglan s lmut n umyurar n JSK, Albert Ebossé i mazal tɛelleq sin yiseggasen-aya. Mebla ma nettu ayen yeḍran deg ussan-agi kan iɛeddan gar MOB akked MCO anda kkren ccwalat d imeqqranen.
Hocine Moula