Ass-nni n lexmis i iεeddan 24/11/2016, i telli s wudem unsib tezrigt tis ttesεa n rreḥba n udlis n Ğerğer, ɣef 10h n ṣṣbah deg temkerḍit tagejdant, i yellin tiwwura-as melmukan. Tin i d-yellan ɣef teɣzi n ddurt, imi tebda ass-nni n amhad 24/11/2016 ad tekfu azekka n aram 29/11/2016. Tettili-d rreḥba-agi n useggas-agi deg ukuẓ n yimukan, ama deg temkerḍit tagejdant n tɣuri taɣerfant n Tizi Uzzu, ama deg uxxam n yidles-is Lmulud At Mεemmer d umaruz-is (annexe) n Azazga, d uxxam n umezgun Kateb Yacine, tettili-d daɣen deg temkerḍiyin n kra n tɣiwanin. D rreḥba n udlis deg tezrigt-is tis tẓa, s usentel “Seg tussnamdan ɣer tgemmi, abrid ɣer yiman” ideg ara ttekkint azal n 30 n tezrigin ara ixedmen timsikiyin n yidlisen-nsent, ad d-nebder gar-asent: El Amel, Arts Plume, La pensée, Tamagit, , Asirem, Richa Elsam, Numide(…). Am wakken daɣen ara yilin 15 n yimaryen ara ixdmen asenzi s ubuddu n yidlisen-nsen, gar:asen Ahcène Mariche, Yousef Merahi, Rabah Ben Amghar, Abderrhmane Yefsah, Idir Bellali, Amziane Lounés, Chabane Imache, Hocine Harouni…Tazrigt-agi ad tettili-d d tajmilt i tlata n wudmawen mucaεen deg wannar n tira, wigi d: Nabil Fares (1934-2016) d Fanny Colonna (1934-2014), akked Mouhamed Brahim Salhi (1952-2016). Aṭas n yidisan i d-isuddsen rreḥba-a n udlis, gar-asen: taneɣlaft n yidles, tanmehla n yidles d uxxam n yidles n Tizi Uzzu, d uxxam n umezgun amniḍan, s lemεawna n tesqamut n leqdicat idelsanen d tẓuri…atg.Heggan-d ahil d amerkanti beddema i leqdic-adi adelsan, imi ttilin-d aṭas n yisaragen d iskasiyen sɣur iselmaden n tesdawit, yecban Said Chemakh, Azeddine Kenzi, Habibi Mohamed Akli…atg. D isaragen i d-yewwin awal ɣer tudert d tira n yimyura-agi i meqqranen n tmurt-nneɣ. Am wakken i d-ttilint yal ass deg ukuẓ n yimukan i d-nebder yakkan, temsikeniyin n 30 n yixxamen tezrigin, i d-isenεaten idlisen-nsent d usenzi s ubuddu n yidlisen n 15 n yimura i d yerza aseggas-agi. Tellili-d daɣen tɣuri n tmedyazt, sɣur aṭas n yimedyazen, yella daɣen usenεet n tceqqufin n umezgun…Ma d ass aneggaru 29/11/2016, ad d-tili tukci n warrazen d igerdasen n usebɣes, deg uxxam n yidles Lmulud At Mεemmer n Tizi Uzzu, i wid akk yettekkin deg rreḥba-agi, ad salin leqdic-agi s yiwet n tceqquft n umezgun “Julius Caesar de William Shakespeare”, ara d-senεet tiddukla tameɣra n Uqbu.
Adaoun Abdelghani.